१
२0७९ मंसिर ३ शनिबार
उदयपुर, मंसिर २
आसन्न चुनाव नजिकिदै गर्दा नेकपा (एमाले)का नेता कार्यकर्ता पार्टी त्यागेर माओबादी र काँग्रेसमा प्रवेश गर्ने क्रम रोकिएको छैन । यसै क्रममा एमाले कटारी नगरपालिका ११ सोरुङछविसेमा वडा कमिटी अध्यक्ष सञ्जिव बस्नेतसहित आधादर्जन नेता कार्यकर्ता माओबादीमा प्रवेश गरेका छन् ।
गत बिहीबार सोरुङमा आयोजित गठबन्धनको चुनावी सभामा बस्नेतलगायत नेता कार्यकर्ता एमाले परित्याग गरी माओबादीमा प्रवेश गरेका हुन् । अध्यक्ष बस्नेत नै एमाले छाडेपछि सिंगो वडा कमिटी निस्कृय भएको स्थानीयले बताएका छन् ।
नवप्रवेशीहरुलाई माओवादीका जिल्ला समन्वय समिति संयोजक बिनोद कटुवाल, प्रदेश विभाग प्रमुख मोहन खत्री, प्रदेश कमिटी सदस्य केपी बरालले अविर माला र खादा लगाएर स्वागत गरेका थिए ।
कार्यक्रममा गठबन्धनका प्रतिनिधिसभा उम्मेदवार तथा नेकपा एकीकृत समाजबादीका उपमहासचिव जगन्नाथ खतिवडा, नेपाली काँग्रेसका केन्द्रीय सदस्य नारायण कार्की, प्रदेशसभा उम्मेदबार रामकुमार खत्री, समानुपातिक उम्मेदबार मिरा कटुवाल, एकीकृत समाजवादी उदयपुरका अध्यक्ष राममणि पोखरेललगायतको उपस्थिति थियो ।
