खोटाङको हलेसीमा सम्पन्न आँखा शिविरमा ६२ जनाको मोतियाबिन्दु अप्रेसन

२

उदयपुर, कात्तिक २२

आँखाका बिरामीहरुलाई लक्षित गरी खोटाङको हलेसीमा सञ्चालित ‘निशूल्क आँखा जाँच शिविर’ मा ५ दर्जन बढीले मोतियाबिन्दुको उपचार पाएका छन् । तुवाचुङ नगरपालिका ७ मा आयोजित शिविरमा जँचाएका ७ सय ६५ मध्ये मोतियाबिन्दु देखिएका एक बालकसहित ६२ को शल्यक्रिया (अप्रेसन) मार्फत ज्योति फर्काइएको हो । 

गएको शनिबारदेखि सोमबारसम्म सञ्चालित ३ दिने शिविर हलेसी तुवाचुङ नगरपालिका, नेपाल नेत्र ज्योति संघ खोटाङ, आँखा तथा कान उपचार केन्द्र हलेसी र आँखा तथा कान उपचार केन्द्र सहयोग समितिको संयुक्त आयोजनामा सञ्चालन गरिएको हो । 

नगरप्रमुख बिमला राईले उद्घाटन गरेको शिविरमा खोटाङसँगै छिमेकी जिल्लाहरु, उदयपुृर, ओखलढुंगा र सोलुखुम्बुसम्मका बिरामीले सेवा पाएको आयोजकले जनाएको छ । मेयर राईका अनुसार कोभिड महामारीअघि नगरले गरेको ‘घरदैलो अभियान’, गत असोजमा सम्पन्न विश्व दृष्टि दिवसको अवसरमा हलेसी तुवाचुङ ३ च्यास्मीटारको ‘आँखा उपचार शिविर’, केही समयअघि हलेसीमा आयोजित ‘ज्येष्ठ नागरिक आँखा जाँच तथा चश्मा वितरण शिबिर’ र अहिलेको शिविर गरेर मोतियाबिन्दुका बिरामी पहिचान गरेको थियो । 

शिविरमा सगरमाथा चौधरी आँखा अस्पताल लाहानबाट आएको १४ जना प्राविधिक टोली परिचालित गरिएको मेयर राईले बताईन् । मोतियाबिन्दु बाहेक आँखामा मासु पलाएको, डल्लो परेको, परेला गाडिएका बिरामीको पनि अप्रेसन गरी आवश्यक औषधि निःशूल्क वितरण गर्नुका साथै सुपथ मूल्यमा चस्मा पनि बिक्री गरिएको छ । 

मेयर राईका अनुसार आँखाका बिरामी नगरबासीको स्वास्थ्य उपचारका लागि बिभिन्न अवसरमा आँखा जाँच र शिविर राखेर मोतियाबिन्दुजस्ता आँखाका रोगीलाई  निःशूल्क उपचार गरिएको हो । खासगरी बृद्धबृद्धाले शिविरमा अप्रेसनपछि निशूल्क औषधि पाउनुका साथै ज्योति फर्केपछि खुसी भएर घर फर्केको देख्न पाउँदा आनन्द लागेको मेयर राईले बताईन् । 

निःशूल्क आँखा जाँच शिविरले गुमेको ज्योति फर्काउन सक्ने भएकाले बेलाबेला यस्ता शिविरहरु सञ्चालन गर्ने गरेको आयोजकमध्येको एक आँखा तथा कान उपचार केन्द्र हलेसीका प्रमुख सुरेन्द्र श्रेष्ठले बताए । लठ्ठी टेकेर शिविर आएका जेष्ठ नागरिक बृद्धबृद्धाहरु आँखा देख्ने भएर फर्कदा मेयर, उपमेयरलगायत जनप्रतिनिधि आयोजकलाई आशिर्वाद दिएका थिए ।