उदयपुर ट्राफिकको राजश्व डेढकरोड बढी  

२

उदयपुर, साउन २७

सवारी साधनको नियमन निकाय जिल्ला ट्राफिक प्रहरी कार्यालयले उदयपुृरमा गत आर्थिकवर्ष डेढ करोड बढी राजश्व संकलन गरेको छ । ०७८ साउनदेखि ०७९ असारसम्म बिभिन्न किसिमका २३ हजार ६ सय ५० वटा सवारी साधनमाथि कारबाही र नियमन गर्दा १ करोड ५२ लाख १८ हजार ५ सय रुपैंया राजश्व संकलन भएको हो । 

सो आर्थिकवर्ष २४ वटा स्काभेटर र जेसिबी, ३ हजार २ सय ८० ट्रक, ९ सय ९३ टिपर, १ हजार १५ बस, ५ हजार ३ सय ४७ कार–जिप–भेनलाई कारबाही गरेको ट्राफिक हवल्दार शम्भु थापाले बताए । ट्याक्टर १ हजार ७ सय ४८ वटा, मोटरसाईकल ९ हजार २ सय ३६ र अटो, टेम्पो तथा सिटी २ हजार ७ वटा कारबाहीमा परेका छन् । 

सबभन्दा बढी राजश्व मोटरसाईकल कारबाहीबाट संकलन भएको छ भने दोस्रो ठूलो राजश्व हिस्सा कार–जिप–भेनबाट उठेको थापाले बताए । वर्षदिनमा ९ हजार २ सय ३६ वटा मोटरसाईकलमाथि कारबाही हुँदा ५८ लाख ७० हजार उठेको छ भने ५ हजार ३ सय ४७ कार–जिप–भेनमाथिको कारबाहीबाट ३४ लाख १४ हजार सकलन भएको छ । त्यस्तै तेस्रो धेरै रकम ट्रकमाथिको कारबाहीबाट संकलन भएको छ । ३ हजार २ सय ८० ट्रकमाथि कारबाही गर्दा २३ लाख १२ हजार ५ सय उठाएको ट्राफिकले १ हजार ७ सय ४८ ट्याक्टरमाथि कारबाही गरी ११ लाख ४४ हजार संकलन गरेको छ । 

२ हजार ७ वटा अटो, सिटी र टेम्पोमाथि कारबाही गरेर ११ लाख १७ हजार उठाएको ट्राफिकले ९ सय ९३ टिपरमाथि कारबाहीबाट ६ लाख ७१ हजार उठाएको छ । १ हजार १५ बसमाथि कारबाही गर्दा ६ लाख ७० हजार संकलन भएको छ भने २८ वटा स्काभेटर, जेसिबीलाई कारबाही गर्दा ३० हजार रकम उठेको ट्राफिकले जनाएको छ । 

अर्का हवल्दार भुवन राईले जिल्ला सदरमुकामदेखि बिभिन्न स्थानीयतहका बजारहरुमा ट्राफिक बिट राखेर सवारी नियमन गर्ने गरिएको बताए । सदरमुकामका गाईघाट, जलजले, चुहाडे, मुर्कुची, साउनेलगायतमा बीट राखेर सवारी नियमन गर्ने गरिएको छ भने बेलका नगरपालिका केन्द्र रामपुर, चतारामा बीट राखिएको राईले बताए । त्यसैगरी चौदण्डीगढी नगरपालिका केन्द्र बेलटार, बसाहा तथा कटारी नगरपालिकाको कटारी बजार, बेलसोत, बेतिनी र घुर्मीमासमेत बिट राखेर सवारी नियमन गर्ने गरिएको हवल्दार राईले बतछाए । 

जिल्ला ट्राफिक प्रहरी प्रमुख वरिष्ट नायव निरीक्षक (वसई) लोकबहादुर दियालीले सवारी नियम उल्लंघन गर्ने सबैखाले साधनमाथि कारबाही गर्ने गरिएको बताए । दुर्घटना हुन नदिन र भए पनि कम जोखिम होस् भनेर ट्राफिकले जिल्लाभरी नियमित चेकजाँच कार्य गर्दा सो अंकको राजश्व संकलन भएको दियालीले बताए । वसई उनका अनुसार पछिल्लो समय गाईघाटमा जनघनत्व र सवारी साधनको संख्या बृद्धिले ट्राफिक नियम उल्लंघनका घट्ना बढ्दो छ । 

दुर्घटना न्यूनिकरण गर्न ट्राफिक नियम उल्लंघन गर्ने सवारी साधनलाई पक्राउ गरी राजश्वस्वरुप जरिवाना तिराउने गरेको वसई दियालीले बताएका छन् । उनले गाईघाट, जलजलेलगायत त्रियुगा नगरपालिकाका बिभिन्न वडामा बिट राखेर नियमित चेकजाँच गर्ने गरिएको बताए ।