२
२0७९ जेष्ठ ३0 सोमबार
उदयपुर
जिल्ला समन्वय समिति खोटाङको प्रमुखमा जनता समाजबादी पार्टीका सनबहादुर राई चयन भएका छन् । बाम–लोकतान्त्रिक गठबन्धनको तर्फबाट उठेका उनी प्रमुख बन्दा नेकपा (माओबादी केन्द्र)का सुरेशकुमार तामाङ उपप्रमुख निर्वाचित भए ।
सोमबार भएको निर्वाचनमा गठबन्धनबाट उठेका उनीहरुले एमालेका किशोर श्रेष्ठ र सन्तोष राईलाई पराजित गरेका हुन् । राई र तामाङले प्रमुख र उपप्रमुखमा क्रमशः १६–१६ मत पाउँदा एमालेका श्रेष्ठ र राईले ४–४ मतमा चित्त बुझाउनु परेको मुख्य निर्वाचन अधिकृत कार्यालयले जनाएको छ ।
सहायक निर्वाचन अधिकृत प्रतिभा राईका अनुसार १० स्थानीयतहका प्रमुख, उपप्रमुख गरी २० मत रहेको खोटाङ समन्वय समितिमा बाँकी ७ सदस्य भने निर्विरोध निर्वाचित भएका छन् । बाम–लोकतान्त्रिक गठबन्धनबाटै उम्मेदवारी दर्ता गराएका सदस्यहरुमा खुलातर्फ काँग्रेसका दुर्गाप्रसाद घिमिरे, ज्ञानेन्द्र राई र मोहन सुप्तीहाङ सदस्य चयन भए ।
त्यस्तै महिला सदस्यमा काँग्रेसकै कला राई र माओवादीकी विष्णुमाया राई तथा नेकपा (एकीकृत समाजवादी)की दिलकमारी राई छानिदा दलित सदस्यमा माओवादीकी चमेली विश्वकर्मा निर्वाचन भईन् ।
२०७४ को निर्वाचनमा १० मध्ये ५ वटा स्थानीयतहमा एमाले एक्लैले विजयी हासिल गरेको खोटाङमा सदरमुकाम दिक्तेल रुपाकोट मझुवागढी नगरपालिकासहित ५ प्रमुख, ७ उपप्रमुख र ३६ वडाध्यक्ष एमालेले जितेको थियो । यस पटक भने एमालेले खोटाङमा २ गाउँपालिका प्रमुख, २ उपप्रमुख तथा १९ वडाध्यक्ष मात्र जित्न सफल भएको छ ।
यस पटक एमालेले दिप्रुङ चुइचुम्मा गाउँपालिकामा प्रमुख र उपप्रमुख, ऐसेलुखर्कमा प्रमुख र रावाबेँसी गाउँपालिकामा उपप्रमुख जितेको छ । यसवर्षको चुनावमा गठबन्धनमा आबद्ध नेपाली काँग्रेस, माओवादी, नेकपा (एकीकृत समाजवादी) र जनता समाजवादी पार्टीबीच चुनावी तालमेल भएपछि एमाले खुम्चिन पुगेको हो । पहिलो निर्वाचनमा सबभन्दा ठूलो दल बनेको एमालेले यो चुनावमा क्षति बेहोर्नु परेको छ ।
२०७४ मा ४ प्रमुख, ३ उपप्रमुख र २७ वडाध्यक्ष जितेको काँग्रेसले यसपटक ६ प्रमुख, ४ उपप्रमुख र ३२ वडाध्यक्ष जितेको छ । अघिल्लो चुनावमा हलेसी तुवाचुङ नगरपालिकामा मेयर उपमेयरसहित बहुमत वडाध्यक्ष जित्न सफल भएको काँग्रेसले यसपटक दिक्तेल रुपाकोट मझुवागढीमा पनि मेयर जितेको छ । काँग्रेसले मझुवागढीमा गठबन्धनबाट मेयर जित्दा माओबादीले उपमेयर जितेको छ । त्यसैगरी काँग्रेसले केपिलासगढी, बाराहपोखरी, साकेला र रावावेंसी गाउँपालिका पनि प्रमुख जितेको छ भने ऐसेलुखर्क, जन्तेढुङ्गा र खोटेहाङ गाउँपालिकामा उपप्रमुख जितेको छ ।
२०७४ मा साकेला गाउँपालिका प्रमुख र १३ वडाध्यक्ष जितेको माओबादीले यसपटक खोटेहाङ र जन्तेढुङ्गा गाउँपालिका प्रमुख, दिक्तेल रुपाकोट मझुवागढी नगरपालिका र साकेला गाँपालिकामा उपाध्यक्ष र २३ वडाध्यक्ष जित्न सफल भएको छ ।
माधव नेपाल नेतृत्वको नेकपा (एकीकृत समाजबादी) र उपेन्द्र यादव नेतृत्वको जनता समाजबादी (जसपा)ले खोटाङमा १/१ उपाध्यक्ष र २/२ वडाध्यक्ष जितेका छन् । गठबन्धनबाट चुनावमा भाग लिएका एसले बाराहपोखरी गाउँपालिकामा उपाध्यक्ष जित्दा जसपाले केपिलासगढीमा उपाध्यक्ष जितेको छ ।
