२
२0७९ जेष्ठ २६ बिहीबार
उदयपुर
उदयपुरबासीलाई वर्षेनी भोग्दै आउनु परेको बाढी पहिरोको चपेटा यसवर्ष पनि सुरु भएको छ । वर्षा सुरु भएसँगै पहाडी भेगका सडकहरु भत्के बिग्रेर यातायात आउजाउमा अवरोध खडा हुन थालेको छ भने तराई र समथर भेगमा खोला बाढीले सताउन थालेको छ ।
केहीदिनअघिसम्म ग्राबेलस्तरका पहाडी सडकहरु अहिले बीच बीचमै भ्वाङ परेर, कटानले भत्किएर र पुरिएर खाल्डाखुल्डी भएका छन् । सदरमुकाम गाईघाटदेखि भुट्टार जोड्ने मुर्कुची पुँवारे भुटुटार खण्डको सडक केहीदिनअघिको वर्षाले जिण्र्या बनाईदिएको छ । उता गाईघाटदेखि साउने, रानीबास हुँदै डहरसम्म कालोपत्रे भए पनि डहरदेखि रौता हुँदै भुट्टारसम्मको अर्को कच्ची सडक पनि सबै ध्वस्त बनाईदिएको छ ।
मुर्कुची पुवारे, माझखर्क बाराहा खण्डको सडक पनि वर्षाले भत्काउने बिगार्ने गरेर आवागमनमा समस्या खडा गरेको छ । त्यस्तै बाराहा बलम्ता, भुट्टार लाफागाउँ जाँते खण्डको सडक, फोक्सिन्टार रसुवा चनौटे, बलम्ता खण्ड त्यस्तै बिग्रेर सवारी आवागमनमा अप्ठेरो बनाईदिएको यातायात व्यवसायीहरु बताउँछन् । केहीदिनयता परेको सामान्य वर्षाले नै पहाडी भेगका कच्ची सडकहरु पुरै भत्काईदिएपछि यातायात आउजाउमा समस्या आएको उदयपुर हिमाली यातायात व्यवसायी केन्द्रले जनाएको छ ।
यता तराईतर्फ पनि खोला नदीमा बाढी आएर डुवान र कटान समस्या बढ्न थालेको छ । गाईघाट आसपास त्रियुगा, लुहाले, हडिया, ठाडी खोला, शाही, सरस्वति, बगाहा र कङ खोलाहरु सामान्य वर्षामै उर्लने भएकाले कटानको समस्या बढेको स्थानीयहरु बताउँछन् ।
केहीदिनअघि मात्र चौदण्डीगढी ९ स्थित हडिया खोलाले एउटा यात्रुबाहक सुमो जीप बगाएर झण्डै दुर्घटना भएको थियो । एक नाबालकसहित ४ जना सवार जीप खोलामा भासिएकै बेला एक्कासी आएको बाढीले झण्डै १ सय मिटर तल पुर्याईसक्दा स्थानीयबासी र प्रहरीले तत्काल थाहा पाएर उद्धार गरेकाले अप्रिय घट्ना भने हुन पाएन ।
नगरपालिका र गाउँपालिको चुनाव भर्खरै सम्पन्न भएकाले जनप्रतिनिधिहरु कार्यभारा सम्हाल्न नपाई दैवी बिपत्ती आईलागिसकेको अवस्था छ । वर्षायाम भित्रि सकेको अवस्थामा भविष्यप्रति उति चासो नराख्ने हामी नेपालीको बानीले पूर्व तयारीको अभावको शिकार यस वर्ष पनि विगतमाजस्तै बेहोर्नुपर्ने टडकारो अवस्था देखा परिसकेको छ । यसबारे जिल्ला बिपत व्यवस्थापन समितिले जनप्रतिनिधि र सरोकारवालाहरुसँग मिलेर बेलैमा सचेत हुँदै आवश्यक योजना तर्जुमा गरेर अघि बढ्नुपर्ने खाँचो छ ।
