२
२0७९ जेष्ठ ११ बुधबार
उदयपुर
नेकपा (माओबादी केन्द्र) का नेता मानबहादुर राई त्रियुगा नगरपालिका १६ को वडाध्यक्षमा दोहोरिएका छन् । ०७४ को स्थानीयतह निर्वाचनमा विजयी राई यस पटकको चुनावमा अत्याधिक बहुमत ल्याएर वडाध्यक्ष दोहोरिएका हुन् ।
माओबादी त्रियुगा नगर कमिटी उपाध्यक्षसमेत रहेका राईले नगरपालिकामा पार्टीको तर्फबाट खाता खोल्दै ९ सय ३२ ल्याएर विजयी भएका हुन् । उनी खसेको कुल मत १ हजार ४ सय ७६ को ६४ प्रतिशत हिस्सा लिन सफल भएका छन् । उनको भागमा परेको थप ७७ मत भने बदर भएको छ ।
राईका प्रतिद्वन्द्वी नेपाली काँग्रेसका रामबहादुर मगर ३ सय ३१ मतमा सीमित हुन पुगे भने एमालेका विष्णुकुमार मगर १ सय १६ मतमा चित्त बुझाउन बाध्य भए । त्रियुगामा मेयर र उपमेयरमा नेकपा (एकीकृत समाजबादी)सँग गठबन्धन गरेको माओबादी एकल लडेको १६ नं. वडामा प्यानलै जितेको छ ।
जस अनुसार माओबादीका उम्मेदवारहरु महिला सदस्य गोमा ढुंगाना कार्की ८ सय ८० मत पाएर जितेकी छिन् भने दलित महिला सदस्य कुन्ती परियारले ८ सय ७५ मत पाएकी छिन् । खुल्ला सदस्यमा घमानसिंह राईले ८ सय ४८ पाएर जिते भने रामनारायण श्रेष्ठले ८ सय २८ मत पाएर सदस्य जितेका छन् ।
दिउसोको नतिजा अनुसार १ मतले पछि परेका काँग्रेसका मेयरका प्रत्यासी बसन्त बस्नेत अहिले ११ मतले अगाडि बढेका छन् । १ हजार ३ सय ६८ मत पाईरहेका बस्तेतभन्दा गठबन्धनका तर्फबाट एकीकृत समाजबादीका उम्मेदवार बलदेव चौधरीले १ हजार ३ सय ५७ मत पाईरहेका छन् । एमालेका प्रत्यासी भागवत राउतलाई ८ सय ६२ मत परिरहेको छ ।
१, २ र १६ नं. वडाको गणना भईरहेकोमा १६ को नतिजा आईसकेको, १ र २ को परिणाम अन्तिम चरणमा पुग्दै गर्दा १५ नं. को गणना थालिएको छ भने अर्को टोली बनाएर ३ नं. को गणना पनि थालेको निर्वाचन अधिकृतको कार्यालयले जनाएको छ ।
