त्रियुगा १२ को स्थगित मतदान खारेज, गणना थालियो

२

उदयपुर

११ दिनअघि रोकिएको त्रियुगा नगरपालिका वडा नंं. १२ मा स्थगित मतदान प्रक्रिया निर्वाचन आयोगले अवैध ठहर्याएको छ । वैशाख ३० गते भएको चुनाव बिबादपछि ४ः३० बजे स्थगित भएको सूचना मतदान अधिकृतले जारी गरे पनि निर्वाचन आयोगले त्यसलाई मान्यता नदिएपछि मंगलबारदेखि मत गणना थालिएको छ । 

मतदान हुँदाहुँदै दिउँसो एक्कासी वर्षा भएपछि लाईन लागेका मतदाता तितरबितर भएका थिए । तर, नङमा मसीको संकेत लगाईसकेका मतदाताहरु वर्षापछि फर्केर आउँदा उनीहरुको मतपत्र गायब भएपछि बिबाद उत्पन्न भएको थियो । उनीहरुको मतपत्र मतदान अधिकृतलगायत कर्मचारीले आफै भोट हालेको आशंका गर्दै बिबाद भएपछि रोकिएको चुनाव पुनः हुनुपर्ने माग हुँदै आउको थियो । 

बिबादपछि मतदानस्थल पुगेका प्रमुख जिल्ला अधिकारी, मुख्य निर्वाचन अधिृकत र राजनीतिक दलका प्रतिनिधिबीच भएको सर्वदलीय छलफल हुँदा मतदान प्रक्रिया स्थगित भएको सूचना जारी गर्ने निर्णय भएको थियो । तर, ११ दिनपछि आएर स्थगित मतदानलाई पुनः सुचारु गर्नुपर्नेमा गणना गर्ने निर्णय भएको भन्दै केही दलले असहमति जनाएका छन् ।

 
पुनः मतदान गर्नुपर्ने माग मुख्य निर्वाचन अधिकृतले पुरा गर्नुको साटो राजीनामा दिएका थिए । जिल्ला अदालतका १ नं. न्यायाधीशसमेत रहेका मुख्य निर्वाचन अधिकृत दीपक खनालले राजीनामा दिए अर्का न्यायाधीश उत्तम सिलुवाललाई उनको ठाउँमा निर्वाचन आयोगले नियुक्ति दिएको थियो । 

यही बीच निर्वाचन आयुक्त रामप्रसाद भण्डारीसहित आयोगको टोली स्थलगत भ्रमणका लागि उदयपुृर आएका थिए । भण्डारीले सर्वपक्षीय छलफल राखेर फर्केको ३ दिनपछि मत गणना गर्ने निर्णयसहितको निर्देशन दिएपछि गणना सुरु गरिएको जिल्ला निर्वाचन अधिकारी खेमराज कोईरालाले बताए । 

गणना गर्नेप्रति नेकपा (माओबादी केन्द्र), एकीकृत समाजबादी पार्टी र जनता समाजबादी पार्टीलगायतले असहमति जनाएका छन् । सर्वदलीय बैठकमा नेपाली काँग्रेस र नेकपा (एमाले)ले गणना गर्नुपर्नेमा जोड दिए भने माओबादी, एस र जसपाले असहमति जनाएको बैठकमा सहभागी माओबादी जिल्ला सचिव किरण राईले बताए । उनका अनुसार विहानदेखि लाईन बसेका मतदाताहरु वर्षाका कारण मत दिने अधिकारबाट वञ्चित भएकाले पुनः मतदान हुनुपर्ने माग माओबादीले राख्दै आएको थियो । 

एस र जसपाले पनि पुनः मतदान गर्नुपर्नेमै जोड दिदै आउँदा मतदान प्रक्रिया सुचारु गरिपाउँ भन्दै उच्च अदालत बिराटनगरमा रिटसमेत परिसकेको छ । तर, यसैबेला मतगणना गर्नुले मतदातालाई मताधिकारबाट वञ्चित गराउन ठहर यी दलहरुले गर्दै बैठकमा ‘नोट अफ डिसेन्ट’ लेखेको राईले बताए । 

आयोगको निर्देशन अनुसार मंगललबार १ः०० बजेदेखि मतगणना वडा नं. १ बाट थालिएको छ । त्रियुगामा १८ हजार ३ सय २० पुरुष र २० हजार ८५ महिला गरी ६० हजार ४६ मतदातामध्ये ३८ हजार ४ सय ५ मत खसेको निर्वाचन अधिकारी कोईरालाले बताएका छन् ।