२
२0७९ बैशाख १८ आईतवार
उदयपुर
सशस्त्र संघर्ष गर्दा दुईवर्षसम्म प्रतिबन्धमा परेको नेत्रविक्रम चन्द (बिप्लब) नेतृत्वको नेपाल कम्युनिष्ट पार्टी (नेकपा)ले आसन्न स्थानीयतह चिर्वाचनमा चुनाव चिन्ह ‘पुतली’ पाएको छ । संसदीय व्यवस्थाको चर्को बिरोधी नेकपाले एकाएक चुनावको पूर्वसन्ध्यामा निर्वाचनको उपयोग गर्ने भन्दै चुनमा भाग लिन लागेको हो ।
पार्टीले उदयपुरमा पनि गाउँपालिका अध्यक्ष, नगर उपप्रमखु र वडाध्यक्ष गरी झण्डै दर्जन हाराहारी उम्मेदवार उठाएको छ । उदयपुरगढी गाउँपालिका प्रमुख, त्रियुगा नगर उपप्रमुख, ३ नगर वडाध्यक्ष र २ गाउँ वडाध्यक्षमा उम्मेदवारी दिएको पार्टीका जिल्ला सेक्रेटरी लक्ष्मण पौड्यालले बताए ।
उनका अनुसार उदयपुरगढी गाउँपालिका अध्यक्षमा जीतबहादुर पुलामी मगरले उम्मेदवारी दिएका छन् भने त्रियुगा नगरपालिकामा रामकृष्ण सदाले उपमेयरमा उम्मेदवारी हालेका छन् । त्रियुगाका ७ मा मानबहादुर दनुवार वडाध्यक्ष, कटारी नगरपालिका ४ मा पूर्णबहादुर कटुवाल वडाध्यक्ष बेलका नगरपालिका ९ को वडाध्यक्षमा मनकुमारी राई (रीता)को उम्मेदवारी परेको छ ।
उम्मेदवारहरु सबै तत्कालीन माओबादी जनयुद्धबाट खारिएर आएका अगुवा नेता कार्यकर्ता भएको पौड्यालले बताएका छन् । उदयपुरगढीमा अध्यक्ष उठेका पुलामी जिल्ला सदस्य तथा गाउँ सेक्रेटरी हुन् भने त्रियुगा नगर उपप्रमुखका दावेदार सदा पुर्व जनप्रतिनिधिसमेत हुन् । बेलका ९ की वडाध्यक्ष उमेदवार रीता जनयुद्धकालीन नेतृ हुन् भने त्रियुगा ७ का वडाध्यक्ष उम्मेदवार दनुवार पनि जिल्ला सदस्य हुन् । त्यसैगरी कटारी ४ का वडाध्यक्ष उम्मेदवार कटुवाल जिल्ला सदस्य तथा पूर्णकालीन कार्यकर्ता हुन् ।
बिप्लव पार्टीका उम्मेदवारले जिल्लाभर एउटै चुनाव चिन्ह पुतली रोजेको छ । निर्वाचन घोषणा भएपछि आयोगले काम थालिसकेको अवस्थामा पार्टी दर्ता गर्न नमिलेपछि स्वतन्त्रको हैसियतमा चुनावमा भाग लिन उसले स्वतन्त्रमा उम्मेदवारी दिएको हो । स्वतन्त्रमा उम्मेदवारी दिएका कारण उसले आधिकारिक चिन्ह नहुँदा पुतली लिएर चुनाव लड्न लागेको जनाएको छ । पार्टीले केहीलाई छाडेर अधिकतर उम्मेदवारहरु जित्ने दावी गरेको छ ।
