एमाले उदयपुर अध्यक्षमा प्रमेश घिमिरे

२

उदयपुर

प्रमुख प्रतिपक्षी दल नेकपा (एमाले) उदयपुरको आठौँ जिल्ला अधिवेशनले प्रमेश घिमिरेको अध्यक्षतामा नयाँ कमिटी सर्वसम्मत चयन गरेको छ । ४ दिनसम्म चलेको बन्दशत्रमा अध्यक्षका ३ आकांक्षीमध्ये घिमिरे सर्वसम्मत नेतृत्व गर्न सफल भएका हुन् । 

शुक्रबार सुरु अधिवेशनको बन्दशत्रले गठन गरेको पार्टी पोलिटव्युरो सदस्य तथा जिल्ला इन्चार्ज मञ्जुकुमारी चौधरीको अध्यक्षतामा गठित अध्यक्षमण्डलले नेतृत्व सर्वसम्मत चयन गरेको हो । 

त्यसैगरी उपाध्यक्षमा ज्ञानेन्द्र श्रेष्ठ छानिएका छन् भने सचिवमा अध्यक्षका दावेदार कालु लामालाई समेटिएको छ । अर्का अध्यक्षका दावेदार खड्ग परियारलाई सचिवालय सदस्य बनाउने तयारी भईरहेको बताइएको छ । उपाध्यक्षका अर्का दावेदार भरत थापा उपसचिवमा सीमित भएका छन् अर्का उपसचिव टेकबहादुर राउत छानिएका छन् । उनी सुरुदेखि सचिवका दावेदार थिए् । 

सुरुमा अध्यक्षमा दावी गरे पनि सर्वसम्मतका लागि पछि हटेका कुशलबाबु बस्नेत पनि सचिव हुन पाएनन् । उनले अधिवेशन हुनुभन्दा सातादिनअघि नै समूह बनाएर अध्यक्षको उम्मेदवारी घोषणा गरेका थिए । दुई महिलासहित ३ जना उपसचिवका दावेदारहरु कोही बाजी मार्न सफल भएनन् । महेश्वरी राई, सिर्जना दनुवार र खगेन्द्र पोखरेलको उपसचिवको दावी सर्वसम्मत नेतृत्व चयनले धुलिचाट बनाईदियो । 

 
शुक्रबार होटल टाउनहलको सभाकक्षमा उद्घाटन भएको अधिवेशन अध्यक्षका आकांक्षी धेरै भएपछि बन्दशत्र सुरु हुनासाथ अध्यक्षमण्डल घोषणा गरेर स्थगित भएको थियो । सर्वसम्मत नेतृत्व चयन हुन नसम्दा अधिवेशन ४ दिनसम्म लम्बिएर सोमबार सकिएको हो । 

यसअघिको ६५ सदस्यीय जिल्ला कमिटीमा पुराना सदस्य सबैलाई कायम गर्दै २९ जना महिला र ८ जना पुरुष सदस्य थपेर अविधेशनले १ सय ५ सदस्यीय जिल्ला कमिटी निर्माण गरेको छ । ४ नगर र ४ गाउँपालिका रहेको उदयपुृरमा सबैबाट पार्टी कमिटीमा प्रतिनिधित्व गराउने प्रयास भएको बताइएको छ । त्रियुगा, कटारी, चौदण्डीगढी र बेलका नगरपालिका तथा उदयपरगढी, रौतामाई, ताप्ली र लिमचुङबुङ गाउँपालिकाबाट सकेसम्म सन्तुलित प्रतिनिधित्व गराउने प्रयास भएको पार्टीले जनाएको छ । 

बिकट गाउँपालिका लिमचुङबु्ङबाट ५ जना नयाँ कमिटीमा सदस्य परेका छन् । जसमा बोधहादुर मगर, बिनोद राई, डिगबहादुर राउत, जानुका राई र बिर्सीमाया मगर छन् । थापामगर जिल्ला समन्वय समिति सदस्य हुन् भने राई पूर्व सचिवालय सदस्य, राउत ३ नं. वडाध्यक्ष, जानुका गाउँ कार्यपालिका सदस्य र बिर्सीमाया गाउँपालिका सदस्य हुन् । 

नवगठित कमिटीका पदाधिकारी र सदस्यलाई मंगलबार विहान सपथ खुवाउने कार्यक्रम तय भएको अध्यक्षमण्डलकी अध्यक्ष चौधरीले बताएकी छिन् ।