२
२0७८ पुष २३ शुक्रबार
उदयपुर
प्रमुख प्रतिपक्षी दल नेकपा (एमाले) उदयपुरको आठांै जिल्ला अधिवेशन शुक्रबारदेखि सुरु भएको छ । सदरमुकाम गाईघाटस्थित टाउन हल होटलको सभाकक्षमा सुरु अधिवेशनमा सर्वसम्मत नेतृत्व चयनको प्रयास गर्ने भनिए पनि अध्यक्षका आकांक्षी भने धेरै देखिएका छन् ।
पार्टीमा गुटबन्दी बढेको भन्दै त्यसका अन्त्य गर्न सर्वसम्मत नेतृत्व चयनको प्रयास गर्ने भनिए पनि आकांक्षी धेरै देखिएका कारण सर्वसम्मत हुने संभावना निकै कम रहेको नेता कार्यकर्ताकै स्वीकारोक्ति छ । चितवन महाधिवेशनमा केपी ओलीको सर्वसम्मत अध्यक्ष हुने प्रयासलाई पूर्व उपाध्यक्ष डा. भीम रावलले उम्मेदवारी दिएर बिफल पारेको असर देशभर देखिने क्रममा उदयपुर पनि अछुतो नरहने देखिएको छ ।
अधिवेशन सुरु नहुँदै आधादर्जन बढीले अध्यक्षमा दावी गरेका हुन्, जसमध्ये ३ जनाले उम्मेदवारी घोषणासमेत गरिसकेका छन् । कोही सर्वसम्मत पाए मात्र नेतृत्व लिने दाउमा छन् भने कतिपय चुनावी प्रतिस्पर्धा गरेरै अध्यक्ष हत्याउने प्रयासमा छन् ।
हालका जिल्ला सचिव प्रमेश्वर घिमिरे र सचिवालय सदस्यहरु कुशल बस्नेत र कालु लामाले अध्यक्षको उम्मेदवारी घोषणा गरेका छन् । घिमिरे र बस्नेतले प्यानलरहित उम्मेदवारी घोषणा गर्दा लामाले टेकबहादुर राउतलाई सचिव बनाएर अध्यक्षको उम्मेदवारी घोषणा गरेका छन् ।
हालका अध्यक्ष इश्वरमणि राउत, उपाध्यक्ष बिमल कार्की, सचिवालय सदस्इ तथा जिल्ला समन्वय समिति प्रमुख खड्ग परियार, अघिल्लो अधिवेशनका पराजित उम्मेदवार दुर्गाकुमार थापा, पराजित सचिव गोपाल खत्री पनि अध्यक्षका दावेदार हुन् । तर, उनीहरुले भने सर्वसम्मत पाए मात्र अध्यक्ष हुने बताईरहेका छन् ।
परियारले औपचारिक रुपमा उम्मेदवारी घोषणा नगरे पनि पार्टीलाई गरेको योगदानको कदरस्वरुप आफु अध्यक्ष हुनुपर्ने दावी गरेका छन् । पार्टी निकट दलित संगठन, समन्वय समिति महासंघ, पार्टी सचिवालय सदस्य भएर ३ दशक बढी अनवरत र सक्रिय योगदान गरेको भन्दै उनले आफुलाई अध्यक्षको योग्व्य र सवल उम्मेदवार ठान्छन् उनी ।
ओलीको ०७७ पुस ५ गतेको संसद विघटनको कदमपछि पुनगर्ठित केन्द्रीय समितिमा सदस्यसमेत मनोनित परियारले पार्टीलाई असल अभिभावकीय नेतृत्व प्रदान गर्न आफु अध्यक्षको हुनुपर्ने दावी गरेका छन् ।
