एमाले लेवीः सदस्यलाई २० रुपैँया, जनप्रतिनिधिलाई एक महिनाको पारिश्रमिक 

२

उदयपुर

नेकपा (एमाले) उदयपुरले संगठित सदस्यलाई २० रुपैँया लेवी तोकेको छ । आउँदो २२ देखि २५ गतेसम्म गाईघाटमा हुन गईरहेको आठौं जिल्ला अधिवेशनको खर्च जुटाउन संंगठित सदस्यदेखि अधिवेशन प्रतिनिधि हुँदै पार्टीबाट निर्वाचित जनप्रतिनिधिसम्मलाई लेवी तोकेको छ । 

पार्टी जिल्ला कमिटीले जनप्रतिनिधिलाई खाईपाई आएको एक महिना बराबरको मासिक पारिश्रमिक लेवीवापत बुझाउनुपर्ने छ भने अधिवेशन प्रतिनिधिलाई जनही १ हजार तथा संगठित सदस्यले २० रुपैंँया बुझाउनुपर्ने श्क्रबार प्रेस चौतारी उदयपुरद्वारा आयोजित पत्रकार सम्मेलनमा जानकारी दिइयो । 

पत्रकार सम्मेलनमा अध्यक्ष इश्वरमणि राउतले संगठित सस्यलाई ‘२० रुपैँया अभियान’ थालेको जानकारी दिए । उनका अनुसार अधिवेशनको खर्च व्यवस्थापन गर्न नेता कार्यकर्तालाई लेवी तोक्ने निर्णय गरिएको हो । उनले संगठित सदस्य, अधिवेशन प्रतिनिधि र स्थानीय जनप्रतिनिधिलाई अधिवेशनका लागि दायित्व तोकिएको र यसले अधिवशेन खर्च व्यवस्थापन गर्न सहयोग पुग्ने बताए । 

अधिवेशन, सभा, सम्मेलनजस्ता पार्टीको गतिबिधि नियमित गर्नुपर्ने र यसका लागि खर्च जुटाउन चन्दा माग्नुपर्ने बाध्यताको अन्त्य गर्न यो तरिका अपनाइएको उनले बताए । यो अभियानले कार्यक्रमको खर्च व्यवस्थापन गर्न सहयोग पुग्ने अपेक्षा पार्र्टीको छ । २० रुपैँयाले सदस्यलाई आर्थिक भार नपर्ने र पार्टीप्रति अपनत्व पनिब हुने उनले बताए ।

उदयपुरमा ८ हजार ४ सय ४५ जना संगठित सदस्य रहेको एमालले जनाएको छ । जस अनुृसार संगठित सदस्यबाट २० रुपैँयाका दरले पनि १ लाख ६८ हजार ९ सय रुपैँया संकलन हुनेछ । ८ वटै स्थानीयतहबाट सहभागी हुने ७ सय अधिवेशन प्रतिनिधिले प्रतिव्यक्ति १ हजार रुपैँयाका दरले बुझाउँदा ७ लाख संकलन हुने अध्यक्ष राउतले बताए । 

स्थानीयतहमा निर्वाचित एमाले जनप्रतिनिधिलाई तोकिएको एक महिनाको पारिश्रमिक छुट्टै आम्दानी हुने पार्टीले जनाएको छ । यी तीनै तहबाट लेबी उठाउन जिल्ला कमिटीले निर्णय गरेर सर्कुलर गरेको छ । उदयपुुरमा एमालेबाट एकजना समानुपातिकसहित ३ प्रदेश सांसद छन् भने जिल्ला समन्वय समिति प्रमुख र उपप्रमुख र ७ सदस्य छन् ।

त्यस्तै ३ जना नगरप्रमुख, २ उपप्रमुख, २ गाउँपालिका अध्यक्ष, ३ उपाध्यक्ष छन् भने ७५ वडामा २६ वडाध्यक्षसहित १ सय ६९ जना कार्यपालिका सदस्य र वडा सदस्य निर्वाचित छन् । उनीहरुबाट एक महिना बराबरको पारिश्रमिक रकम लिँदा आर्थिक बोझ धेरै हसज हुने अनुमान पार्टीले गरेको छ । अधिवेशनमा ८ देखि १० लाख रुपैँया खर्च हुने अनुमान पार्टीले गरेको प्रेस चौतारी उदयपुरका अध्यक्ष गणेश उप्रेतीले बताए ।  । 

अधिवेशनको लोगो सार्वजनिक 

एमालेले आसन्न अधिवेशनको लोगो पनि पत्रकार सम्मेलनमा सार्वजनिक गरेको छ । केन्द्र्रीय सदस्यद्वय मञ्जुकुमारी चौधरी र अम्बिका थापा तथा अध्यक्ष राउतलगायत नेताहरुले सामुहिक रुपमा लोगो सार्वजनिक गरे । लोगोमा पार्टीको चुनावचिन्ह, मजदुर किसानको संकेत चिन्ह हसिया हथौडा र जिल्लाको भौगोलिक अवस्था, प्राकृतिक सम्पदा र ऐतिहासिक धरोहर अंकित छ ।