नेपाली काँग्रेस खोटाङ सभापतिमा विष्णु राई, उदयपुरमा भोलि मतदान

२

उदयपुर

नेपाली काँग्रेस खोटाङको जिल्ला नेतृत्व निर्वाचन प्रक्रियामार्फत चयन भएको छ । बिहीबार सम्पन्न चुनावको शुक्रबार सार्वजनिक मतपरिणाम अनुसार पूर्व सभापतिसमेत रहेका विष्णुकुमार राईले ६ सय ६९ मत पाएर सभापति जितेका हुन् । 

सभापतिको अर्का प्रतिस्पर्धी सर्वधन राईले ६ सय १० मत पाएका छन् । त्यसैगरी उपसभापतिमा इवन राई र तीर्थराज भट्टराईले स्थान सुरक्षित गरेका छन् । हलेसी तुवाचुङ नगरप्रमुखसमेत रहेका इवन राईले ७ सय ५३ मत पाएका छन् भने भट्टराईलाई ७ सय ४२ मत परेको छ । 

उपसभापतिका ४ जना प्रतिस्पर्धीमध्ये मनोज तिमल्सिनाले ५ सय ४३ मत पाए भने अर्का स्पर्धी राजन सैंजुलाई ३ सय ८४ मत परेको छ । त्यसैगरी सचिवमा क्रमशः समीर राई र ज्ञानेन्द्र जोशी निर्वाचित भएका छन् । राईले ७ सय १३ मत ल्याए भने जोशीलाई ६ सय २० मत पर्यो । सचिवका उम्मेदवारहरु रोजन राई र राम साम्पाङ क्रमशः ५ सय ५ सय ५३ र ५ सय ११ मत पाएर पराजित भए ।  

प्रतिस्पर्धी ४ सहसचिवमध्ये राजकुमार राई र ध्यानबहादुर राई विजयी भएका छन् । उनीहरुले क्रमशः ५ सय ७७ र ५ सय ६४ मत पाएको पार्टीले जनाएको छ । सहसचिवका दुई उम्मेदवारहरु सार्जन राई र शालिक बन्जरालाई क्रमशः ६ सय २४ र ५ सय ९३ मत प्राप्त भएको पार्टीले जनाएको छ । 

खोटाङमा प्रदेश (क) मा राजेन्द्र राई र प्रदेश (ख) दिनेश घिमिरे प्यानलसहित निर्वाचित भएको जनाइएको छ । 

यता उदयपुरमा भने शनिबार मतदान हुने तयारी भईरहेको छ । उदयपुरमा सभापतिका लागि ३ जनाले दावी गरे पनि २ जनाबीच चुनावी प्रतिस्पर्धा हुने संभावना बलियो रहेको पार्टीले जनाएको छ । 

सभापतिका लागि महिला नेतृ प्रमिला राई, वर्तमान सभापति विदुर बस्नेत र पूर्व सभापति हिमाल कार्कीले दावी गरिहेका छन् । २००७ सालका क्रान्ति योद्धा बलबहादुृर राईपुत्री प्रमिला सर्वसम्मत सभापति हुन चाहेकाले चुनावी स्पर्धामा जानु परे पछि हट्ने संभावना रहेको बताइएको छ । 

एकपक्ष कार्यकर्ताहरु भने बस्नेतलाई पछि हटाएर राईलाई सभापतिको उम्मेदवार बनाउने योजनामा रहेका छन् । बस्नेत रामचन्द्र–सशांक समूहबाट र कार्की संस्थापन (देउवा)पक्षबाट सभापतिमा प्रतिस्पर्धा गर्दैछन् । दुवै पक्षले अहिलेसम्म पार्टीको बुथदेखि वडा, स्थानीयतह, प्रदेश हुँदै संघीय निर्वाचन क्षेत्रसम्म स्पष्ट रुपमा प्यानल खडा गरेर प्रतिस्पर्धा गर्दै आएका छन् । 

अहिलेसम्मको नतिजा अनुसार अधिकतर सीटमा कार्की खेमाले जित हासिल गरेको छ । पछिल्लो परिणाम अनुसार संघीय निर्वाचन क्षेत्रको स्पर्धामा १ बाट खगेन्द्र राईको प्यानल र २ मा रामकुरमा राईको मिश्रृत प्यानलले कार्की खेमाबाट जित हासिल गरेको छ ।