३
२0७८ कार्तिक ३0 मंगलवार
उदयपुर
पेट्रोलियम पदार्थको मूल्यबृद्धिविरुद्ध आव्हान भएको ‘नेपाल बन्द’ले उदयपुरको जनजीवन आंशिक प्रभावित पारेको छ । नेत्रविक्रम चन्द (बिप्लव) नेतृत्वको नेपाल कम्युनिष्ट पार्टी (नेकपा) ले आव्हान गरेको मंगलबारको बन्दका कारण सदरमुकाम गाईघाटको बजार, पसल र यातायात प्रभावित भएको हो ।
नेकपा र माओबादी मजदुर पार्टी (मामपा)को संयुक्त आयोजनामा भएको बन्द विहान ९ः०० बजेसम्म ठप्प भए पनि अहिले साना सवारी साधनलाई भने खुल्ला गरिएको छ । बन्दकर्ताले आंशिक खुकुलो पारेपछि अहिले स्कुटर र मोटरसाईकल निर्वाध चलेका छन् ।
विहानदेखि ठूला साना सबैखाले सवारी साधन चल्न अवरोध गरेका बन्दकर्तालाई चुनौति दिदै सुरक्षाकर्मीले यातायात चलाउन स्कटिङ गर्न थालेपछि बस र ट्रक, ट्याक्टर, जीप र अटोलगायत साधन रोकेर मोटरसाईकल र स्कुटीको आवागमन खुल्ला गरिएको हो ।
बन्द सफल पार्न नेकपा र मामपाका कार्यकर्ताहरु बजारका बिभिन्न चोकमा झण्डासहित गोलबन्द भएर खटेका छन् । गाईघाटसँगै कटारी, बेलटार र रामपुरलागयत बजारमा पनि बन्दको आंशिक प्रभाव परेको स्थानीयले बताएका छन् ।
बन्दमा अहिलेसम्म कतै झडप, मुठभेड र झैझगडा भएको खवर नआएको जिल्ला प्रहरी कार्यालय उदयपुरले जनाएको छ । प्रहरी प्रमुख एसपी सुभाषचन्द्र बोहराका अनुसार विहानदेखि अहिलेसम्म कतै नराम्रो घट्नाको खवर आएको छैन । उनले सदरमुकाममा पसल, व्यापार बन्द भए पनि चल्न चाहने यातायात सुचारु गर्न सुरक्षाकर्मीले स्कटिङको व्यवस्था मिलाएको बताए ।
