३
२0७८ कार्तिक ८ सोमबार
उदयपुर
नेपाली काँग्रेसका केन्द्रीय सदस्य तथा परराष्ट्रमन्त्री डा. नारायण खड्काले बहुचर्चित अमेरिकन परियोजना मिलेनियम च्यालेन्ज कर्पोरेशन (एमसीसी) दलीय सहमति गरेर पास गर्नुपर्ने बताएका छन् । गृह जिल्ला गाईघाटमा सोमबार आयोजित पत्रकार भेटघाट कार्यक्रममा बोल्दै डा. खड्काले दलीय सहमतिपछि मात्र एमसीसी पास हुने बताएका हुन् ।
काँग्रेसनिकट नेपाल प्रेस युनियन उदयपुरले आयोजना गरेको पत्रकार भेटघाट कार्यक्रममा खड्काले एमसीसी पास गराउने विषयमा सबै राजनीतिक दलहरुसँग छलफल भईरहेको बताए । यो विषय संसदको बिजनेस भएकाले संसदबाटै छिनोफानो हुने पनि उनको भनाई थियो ।
‘एमसीसी सिंगो राष्ट्रसँग सम्बन्धित परियोजना भएकाले पास गर्ने नगर्ने भन्ने कुरामा दलीय सहमतिको खाँचो हुन्छ’ खड्काले भने ‘त्यसैले यसबारे गठबन्धन दलहरुबीच मात्र नभएर प्रतिपक्षी दल एमालेसँग पनि छलफल हुनुपर्छ । साझा धारणा बनाएर मात्र पास गराउनुपर्छ ।’
अहिले सरकारले कोविड नियन्त्रणमा प्राथमिक्ता दिएको पनि खड्काले बताए । जनतालाई कोविडमुक्त बनाउने सरकारको पहिलो कर्तव्य भएको भन्दै त्यसका लागि सरकार प्रतिबद्ध भएर लागिरहेको उनले बताए । खोप पाउन बाँकी उमेर समूहलाई पनि सरकारले छिटै लगाउने व्यवस्था मिलाउन खोप ल्याउने काम भईरहेको डा. खड्काले बताए ।
उदयपुर निर्वाचन क्षत्र नं. १ बाट प्रतिनिधिसभा सदस्य रहेका खड्का परषट्रमन्त्री भएपछि पहिलो पटक गृहजिल्ला आएका हुन् । अघिल्लो साँझ गाईघाट आईपुगेका उनी आसन्न पार्टीको १४ औं महाधिवेशनमा संस्थापनपक्षलाई मजबुत बनाउने अभियान सफल पार्न आएको एक काँग्रेस नेताले बताए । ्
उदयपुरमा देउवा, पौडेल र सिटौलापक्षमा काँग्रेसीहरु विभाजित छन् । देउवा खेमाको अगुवाई गर्ने पूर्व जिल्ला सभापति हिमाल कार्कीलाई खड्काले सहयोग गर्दै आएका छन् । पौडेल पक्षको अगुवाई हालका सभापति विदुर बस्नेतले गर्दै आएका छन्् ।
