२
२0७८ आश्विन १८ सोमबार
उदयपुर
उदयपुर प्रहरीले ‘६६ औं प्रहरी दिवस ०७८’को अवसर पारेर सर्वसाधारणलाई मास्क बितरण गर्न थालेको छ । आउँदो २० गते पर्ने प्रहरी दिवसको अवसरमा बिभिन्न सामाजिक गतिबिधि गर्ने क्रममा मास्क बितरण अभियान पनि थालेको हो ।
जस अनुसार आईतबार दिउँसो गाईघाट बजारका बिभिन्न चोक र सडकहरुमा जिल्ला प्रहरी कार्यालय, ट्राफिक प्रहरी कार्यालय र नेपाल रेडक्रस सोसाईटीको समन्वयमा मास्क बितरण गरिएको हो । प्रहरी, रेडक्रस र ट्राफिक प्रहरी सहभागी टोली बजारमा मास्क नलगाई हिड्ने यात्रुलाई बोलाएर मास्क लगाईदिएका छन् ।
प्रहरी दिवसको अवसरमा ‘तपाँईको मास्क खोई ?’ लेखिएको व्यानर बोकेको टोली बजारका बिभिन्न ठाउँ घुमेर मास्क बितरण गरेको छ । रेडक्रसका कर्मचारी, जिल्ला प्रहरी कार्यालयका नायव निरीक्षक (सई) गंगाराम राई र ट्राफिक प्रहरी प्रमुख सई लिलाकुमार श्रेष्ठलागयत सम्मिलित टोलीले सर्वसाधारणलाई मास्कको महत्व दर्साउँदै बितरण गरेको हो ।
कोविड नियन्त्रणतर्फ आईरहे पनि अझै खतरा हटिनसकेका कारण मास्क लगाउन अनिवार्य गर्नुपर्ने प्रहरीको भनाई छ । हाल उदयपुरमा कोविड नियन्त्रणोन्मुख देखिएको भए पनि अझै खतरा भने कम नभईसकेकाले मास्क अनिवार्य लगाउन टोलीले आग्रह गरेको छ । त्यस्तै घरभित्र बस्नुअघि, खाना खानुअघि र पछि साबुन पानीले अनिवार्य हात धुन र नियमित सेटिनाईजर प्रयोग गर्न पनि टोलले अनुरोध गरेको छ ।
