त्रियुगा काँग्रेस सभापतिमा प्रकाश खड्का, कार्की पक्ष सबल देखियो

३

उदयपुर

नेपाली काँग्रेसको त्रियुगा नगर सभापतिमा प्रकाश खड्का विजयी भएका छन् । पार्टीको आसन्न १४ औं महाधिवेशनअन्तर्गत जिल्लाका ८ वटै स्थानीयतहमा गाउँ तथा नगर अधिवेशन सम्पन्न हुने क्रममा त्रियुगामा खड्काले सुमन चौधरीलाई पराजित गर्दै सभापति जितेका हुन् । ४ नगरपालिका र ४ गाउँपालिका रहेको उदयपुरमा दुई गाउँपालिकामा निर्बिरोध र बाँकीमा चर्को प्रतिस्पर्धाका साथ शनिबार अधिवशेन सकिएको हो ।

पार्टी जिल्ला कार्यालयका अनुसार आउँदो जिल्ला अधिवेशनमा पूर्व सभापति हिमाल कार्की र वर्तमान सभापति बिदुर बस्नेतबीच प्रतिस्पर्धा हुदैछ । सोही अनुसार छुट्टाछुट्टै प्यानल खडा गरेर खडा भएका प्रतिस्पर्धीहरुले आईतबार विहानसम्ममा मैदान सफा गरिसकेका छन् । कार्की र बस्नेत दुवै आउँदो जिल्ला अधिवेशनमा सभापतिको दावेदार हुन् । कार्की खेमालाई उदयपुर प्रतिनिधिसभा १ नं. का संघीय सांसद तथा नवनियुत्तः परराष्ट्रमन्त्री डा. नारायण खड्काको पनि सहयोग छ । 

शनिबार भएको ४ नगरपालिका र २ गाउँपालिकाको मत परिणामले कार्की पक्ष सबल देखिएको छ । कार्कीपक्षलाई त्रियुगा, चौदण्डीगढी, बेलका र लिमचुङबुङ गाउँपालिकाकमा सभापतिसहित प्यानलै हात परेको छ । बेलकामा अशोक कार्की पक्षले बस्नेत प्यानलका बाबुराम थापालाई ४८ मतका विरुद्ध ९७ मत पाएर प्यानलै जितेको छ । कार्की ०७४ को स्थानीयतह निर्वाचनमा बेलका नगरपालिका मेयरका पराजित उम्मेदवारसमेत हुन् । 

त्यसैगरी चौदण्डीगढी नगरमा पनि कार्की पक्षकै राजेन्द्र पौडेलको प्यानल जितेको छ । उनले बस्नेत प्यानलका रामकुमार खड्कालाई पराजित गरेका हुन् । १ सय ८३ मतदाता रहेको चौदण्डीगढीमा कार्की प्यानलका पौडेलले ९६ मत ल्याए भने बस्नेत प्यानलका खड्कालाई ७३ मत परेको पार्टी निर्वाचन समितिले जनाएको छ । 

सबभन्दा बढी मतदाता रहेको सदरमुकाम त्रियुगा नगरपालिकामा पनि कार्की प्यानलकै प्रकाश खड्का सभापतिसहित ७ सदस्यीय समितिमा ४ जना जितेका छन् । बाँकी ३ जना भने बस्नेत प्यानलका उम्मेदवार सुमन चौधरी खेमाकाले जितेका छन् । ३ सय ८२ मतमध्ये २० मतको अन्तरले चौधरीलाई पराजित गर्दै खड्का सभापति जितेका हुन् । उता कटारी नगरपालिकामा भने बस्नेत प्यानलका प्रकाश थापा सभापतिसहित प्यानलै जितेका छन् । कटारीमा कार्की प्यानलका प्रेम थापाले ८२ मत पाउँदा बस्नेत प्यानलका प्रकाश थापाले १ सय ४९ मत ल्याएका छन् ।  

गाउँपालिकातर्फ रौतामाईमा बस्नेत प्यानलकै घमानसिंह थापामगर सभापति जितेका छन् । उनले कार्की प्यानलका टेकबहादुर दाहाललाई ७३ विरुद्ध ९६ मत ल्याएर सभापति हात पारेका हुन् । त्यसैगरी अर्को गाउँपालिका लिमचुङबुङमा कार्की प्यानलकै नेत्र कार्कीले सुनिल राईलाई पराजित गरेर सभापति हात पारेका छन् । ८२ मतदाता रहेको लिमचुङबुङमा प्रतिस्पर्धीबीच दुई मतको मात्र फरकले कार्कीले सभापति उछिट्याएका हुन् ।

अर्को गाउँपालिका ताप्ली र उदयपुरगढीमा भने सभापतिलगायत अन्य पदाधिकारी पनि निर्बिरोध चयन भएको पार्टीले जनाएको छ । उदयपुरगढी सभापतिमा यमबहादुर पाण्डे र ताप्ली गाउँ सभापतिमा दिपबहादुर रास्कोटी ठकुरी निर्बिरोध निर्वाचित भएका छन् । नगर गाउँ अधिवेशन सकिएपछि क्षेत्रीय अविधेशनको तयारीमा पार्टी लाग्ने जिल्ला सभापतिका आकांक्षी हिमाल कार्कीले बताए ।