नेकपा (एस)का कार्यकर्ता फर्काउन एमालेको समयसीमा 

३

उदयपुर

माधव नेपाल नेतृत्वको नेकपा (एकीकृत समाजबादी)मा गएका नेता कार्यकर्तालाई फर्काउन नेकपा (एमाले)ले दुईदिन समय दिएको छ । नेकपा (एकीकृत समाजबादी)ले अध्यक्ष आफ्नो ठाउँमा राममणि पोखरेललाई अध्यक्ष बनाएर पुरानै समितिलाई चलायमान बनाएकै दिन एमालेले फर्कन चाहने नेता कार्यकर्ताका लागि दुईदिन समयसीमा तोकेको हो । 

एमाले अध्यक्ष तत्कालीन प्रधानमन्त्री केपी ओलीले दुईपटक संसद बिघटन गरेपछि माधव समूहले एमालेकै अध्यक्ष इश्वरमणि राउतको अध्यक्षतामै समानान्तर कमिटी बनाएको थियो । तर, पार्टी बिभाजनपछि अध्यक्ष इश्वरमणि राउत एमालेमै रहने भएपछि उनलाई कारबाही गर्दै पोखरेलको अध्यक्षतामा समानान्तर समितिलाई नेकपा (एस)को जिल्ला कमिटीमा परिणत गरेको कुरा बुधबार साँझ पत्रकार सम्मेलन गरी जानकारी दिएको थियो । 

यता एसले पत्रकार सम्मेलन गरेकै समयमा उता एमालेले पनि पार्टी कार्यालयमा पत्रका सम्मेलन गर्दै मुलघर फर्कन चाहने नेता कार्यकर्तालाई दुईदिनको समय दिने जानकारी गराएको हो । तेस्रो धारले १० बुँदे सहमति कार्यान्वयन गराउँने सहमतिका साथ पार्टी संरचनालाई ०७५ जेठ २ गतेकोे अवस्थामा फकाउने भएपछि आफु संस्थापनपक्षमा बस्ने निर्णय गरेको भन्दै राउतलले घर फर्कन चाहनेहरुलाई दुईदिन समय दिइने बताए । एमालेले खासगरी नेकपा (एस) रोजेर निर्वाचन कार्यालयमा सनाखत गरेका २८ जनप्रतिनिधिलाई लक्षित गर्दै यो कदम चालेको हो ।

पत्रकार सम्मेलनमा एमाले केन्द्रीय सदस्य मञ्जुकुमारी चौधरीले घर फर्कन चाहने नेता कार्यकर्ताका लागि दुईदिन पर्खने र फर्केको खण्डमा पुरानै जिम्मेवारीमा राखिने र नफर्कनेहरुलाई जिम्वेवारीमुक्त गर्ने निर्णय भएको बताईन् । पदको लोभलालचमा परेर केही साथीहरुले पार्टी चोईट्याएको भन्दै केन्द्रीय सदस्य चौधरीले त्यस्ता जनप्रतिनिधि र नेता कार्यकर्ताहरुलाई आफ्नै घर फर्कन आव्हान गरिन् । 

अध्यक्ष चौधरीले ‘हिजो सूर्य चिन्हबाट निर्वाचित भएका जनप्रतिनिधिहरु जनतासँग गरेको वाचा र प्रतिबद्धता पुरा गर्न पुरानै घर फर्कनुपर्ने भन्दै अहिले पनि घर फर्कदा केही नविग्रेको बताए । लोभलालच, प्र्रलोभन र धाकधम्कीमा परेर गएको भए घर फर्कदा केही फरक नपर्ने भन्दै उनले पुरानो घर फर्कनकै लागि पार्टीले दुई दिनको समय दिएको र यसलाई सुनौलो अवसर ठानेर आउन आग्रह गरे । उनले १० बुँदे सहमति अक्षरशः कार्यान्वयन गर्न पार्टी नेतृत्व तयार रहेको हुनाले कम्युनिष्ट आन्दोलनबाट भाग्न नहुने बताए । 

एमाले २०७५ जेठ २ मा फर्कपछि १ सय ३ सदस्यीय जिल्ला कमिटी ३५ सदस्यीय सचिवालय र क्षेत्रीयत्र, नगर, गाउँपालिका, वडा कमिटी र जनवर्गीय संगठन तथा त्यसका इन्चार्ज, सहइन्र्चाज र पदाधिकारी पुरानै अवस्थामा पुनस्र्थापित हुने पत्रकार सम्मेलनमा जानकारी दिइयो । जिल्ला सचिव प्रमेश घिमिरेले एकताबद्ध एमाले बनाउन गाउँसम्म संगठन अभियान सञ्चालन गर्नुपर्ने भन्दै एसमा गएकाहरुलाई पुन घर फर्कन आग्रह गरे । माधव नेपाल समूहबाटै सचिब भएका घिमिरे ओलीको संसद बिघटनको कदमलाई प्रतिगामी भन्दै भएको आन्दोलनमा सहिक भई केहीदिनपछि ओली खेमामा गएर जिल्ला अध्यक्ष भएका थिए । 

पार्टी छाड्नेहरुलाई एकपटक अवसर दिन बैठकमा बोलाउने, नआए जिम्मेवारीमुक्त गरेर अघि बढ्ने जनाएको छ । बिभाजनपछि बसेको पहिलो बैठकले असोज मसान्तभित्र पार्टीको संगठित सदस्यता नविकरण र नयाँ सदस्यता वितरणको काम सुरु गर्ने निर्णय गरेको पनि जनाइएको छ । प्रदेश सांसदहरु बिमल कार्की र अम्बिका थापाले सीमित जनप्रतिनिधि मात्र एमालेबाट चोईटिएर गएको भन्दै त्यसले पार्टीलाई केही फरक नपर्ने बताएका थिए । 

निर्वाचन आयोगबाटै कानुनी मान्यता पाएर एमाले र जसपाबाट अलग भएका एस र लोसपामा जान चाहने जनप्रतिनिधिलाई निर्वाचन आयोगले भदौ २२ गतेसम्म दल रोज्ने समय दिएको थियो । जस अनुसार उदयपुरका ८ स्थानीयतहमध्ये त्रियुगा नगरप्रमुख बलदेव चौधरी र उदयपुरगढी गाउँपालिका अध्यक्ष मानबहादुर केप्छाकी मगरले नेकपा (एस) रोजेका छन् । त्यस्तै, जिल्ला समन्वय समिति सदस्य चीनवीर दनुवार, ५ जना वडाध्यक्ष, कार्यपालिका सदस्य र वडा सदस्यगरी २८ जनाले एमाले त्यागेका छन् । 

एमालेलेकै भाषामा १३ दशमलव २ प्रतिशत जनप्रतिनिधिले नेकपा (एस) रोजेका छन् । २०७४ को स्थानीयतह चुनावमा कुल २ सय १० जना निर्वाचन र ८ जना मनोनित प्रतिनिधिमध्ये २८ ले नेकपा (एस) रोजेपछि अव एमालेमा १ सय ९० बाँकी छन् । ४ नगरपालिकामध्ये चौदण्डीगढीमा कांग्रेस र बाँकी ३ नगरप्रमुख तथा ४ गाउँपालिकामध्ये लिमचुङबुङमा नेकपा (माओबादी केन्द्र)बाहेक ३ मा अध्यक्ष एमालेकै पोल्टामा परेको थियो । दुई नगरमा उपप्रमुख र ३ गाउँपालिकामा उपाध्यक्ष तथा ७५ वडामध्ये ३१ वडाध्यक्ष एमालेले जितेको थियो । जिल्ला जिल्ला समन्वय समिति प्रमुख, उपप्रमुखसहित सेटै एमालेबाट विजयी रहेकोमा एक सदस्य चीनवीर दनुवारले नेकपा (एस) रोजेका छन् ।