आँखा अस्पताल आउँदो पुसदेखि सञ्चालन हुने

३

गाईघाट

उदयपुर सदरमुकाममा लामो समयदेखि सञ्चालित प्राथमिक आँखा उपचार केन्द्र छिट्टै मदन भण्डारी आँखा अस्पतालको रुपमा स्तरोन्नतिसहित चल्ने भएको छ । गाईघाट र बोक्सेबीच त्रियुगा नगरपालिका ९ बाँसबारीस्थित निर्मित नयाँ भवनमा आउँदो पुसदेखिबाट अस्पाल सञ्चालनमा ल्याउने तयारी र्भरहको व्यवस्थापन पक्षले जनाएको छ । 

शुक्रबार आँखा अस्पताल परिसरको पितृस्मरण स्थलको बार्षिकोत्सवमा सो कुराको जानकारी दिइएको हो । अस्पताल व्यवस्थापनको जिम्मा पाएको नेपाल नेत्रज्योति संघ उदयपुरका अध्यक्ष भागवत राउतले सम्पूर्ण भौतिक पुर्वाधार सम्पन्न भईसकेको र अस्पताललाई चाहिने औजार उपकरण उपलब्ध भईसकेकाले ३ महिनाभित्र सञ्चालनमा ल्याउन लागिएको बताए । 

अस्पताल परिसरलाई हरियालीयुक्त बनाउने उदेश्यले मृतक आफन्तको नाममा विरुवा लगाउने काम एकवर्षअघि गरिएको थियो । सो अनुसार त्यहाँ झण्डै ५ सय हाराहारी विरुवा रोपिएको थियो । सोही विरुवा रोपन कार्यक्रमको वर्षदिन पुगेको अवसरमा आयोजित कार्यक्रममा अस्पताल सञ्चालनमा ल्याउने तयारी भईरहेको कुरा अध्यक्ष राउतले जानकारी दिए । 

पितृ स्मरणका लागि रोपिएका विरुवाको अस्पतालका कर्मचारीबाट स्याहारसुसार र हेरचाह हुँदै आएको छ । तर, पनि विरुवा रोप्नेहरु स्वयं बेलामौकामा उपस्थित भएर गोडमेल गर्ने र पानी हाल्ने कार्य गर्दै आएका छन् । संघका उपाध्यक्ष कृष्ण भण्डारीका अनुसार विरुवा रोपेको ठाउँमा आउँदा आफ्नो पृतिको सम्झना हुने भएकाले समय मिलाएर अधिकांस आफन्त अस्पताल आएर गोडमेल र पानी हाल्ने गरेका छन् । 

वार्षिकोत्सव कार्यक्रममा संघका केन्द्रीय अध्यक्ष प्राध्यापक डा. चेतराज पन्त पनि आएका थिए । उनले उदयपुर शाखाले चलाएको अस्पताल मुलुकभरीका अस्पतालमध्ये उत्कृष्ट भएको बताए । अस्पताललाई हरियाली बनाउने अभियानमा उदयपुर पहिलो हुन सफल भएको भन्दै उनले प्रशंसा गरे । अस्पताल मन्दिरको पनि घर भएको भन्दै डा. काफ्लेले त्यसको वरिपरि स्वस्थ्य र सुन्दर वातावरण बनाउन सके आधा विरामी निको हुन सहयोग पुग्ने बताए । 

संघका महासचिब भरतबहादुर चन्दले अस्पताल सञ्चालन गर्नुभन्दा पनि त्ससले दिने सेवासुबिधा प्रभावकारी बनाउनुपर्नेमा जोड दिए । उनले बिरामीको उपचार सेवालाई प्राथामिकतामा राखेर गतिबिधि अगाडि बढाउनुपर्ने भन्दै उदयपुर अस्पतालको सिको गरेर मुलुकभरका अस्पताल परिसरलाई हरियाली बनाउने अभियान चलाइएको बताए । 

उदयपुरमा सञ्चालन हुने आँखा अस्पतालले उदयपुरबाहेक, खोटाङ्ग, ओखलढुंगा र भोजपुरसम्मका जनतालाई सेवा पुग्ने आँखा चिकित्सक मुरारी तिम्सीनाले बताए । उनका अनुसार हालसम्म देखिएको बिरामीहरु बढी मात्रामा मोतियाविन्दु, रतन्धो र
अन्धोपन बढी छन् । अन्धोपन निवारणमा अस्पतालले प्रमुख भूमिका निर्वाह गर्ने योजना रहेको तिमसीनाले बताए । 

कार्यक्रमका सहभागीहरुले हरियाली बनाउने नाममा विरुवा रोपन शीर्षकमा सरकाररले करोडौँ रुपैँया खर्च गरे पनि प्रभावकारी नदेखिएकोमा अस्पतालले सुरु गरेको हरित अभियानले प्रगतिलाई नमूना मान्नुपर्ने बताए ।