३
२0७८ भाद्र १४ सोमबार
रामपुर
केही दिनयताको लगातार वर्षाका कारण सप्तकोसीमा आएको उच्च बाढीले नदी फुटेर उदयपुरतर्फ क्षति गर्ने उच्च जोखिम बढेको छ । कोसीको बाढीको भँगालो उदयपुरतर्फ आउँदा जिल्लाको बेलाका नगरपालिका ८ लाहुरे खोलास्थित नदी फुटेर गाउँ पसेपछि बेलकाका ४ वडाबासी र सप्तरीका केही स्थानीयतहलाईसमेत क्षति गर्ने जोखिम बढेको हो ।
नदी फुटेर धार परिवर्तन गरेपछि बेलका नगरपालिकाका वडा नं २, ३, ८ ९ मा ठूलो जनधनको क्षति गर्ने संभावना भएको भन्दै स्थानीयले जिल्ला बिपत व्यवस्थापन समिति र प्रहरी प्रशासन गुहारेका छन् । स्थानीयले गुहार मागेपछि जिल्ला बिपत व्यवस्थापन समितिको बैठक आईतबारै बसेर आवश्यक चाँजोपाँजो मिलाउने निर्णय गरेको छ ।
निमित्त प्रमुख जिल्ला अधिकारी विनोदकुमार पोखरेलको अध्यक्षतामा, सुरक्षा निकाय प्रमुखहरु, जनप्रतिनिधि र सरोकारवाला निकायका प्रमुख र प्रतिनिधिहरुको सहभागितामा बसेको बैठकले आवश्यक सुरक्षा सतर्कता अपनाउर्दै तत्काल कटानबाट बँच्ने उपाय अवलम्बन गर्ने निर्णय भएको जनाइएको छ । जस अनुसार कोसी फुटेको ठाउँमा तत्काल बाँध बाँध्नका लागि आवश्यक तयारी थाल्ने, भएका –स्रोतसाधनको उपयोग गर्ने, स्थानीयलाई सुरक्षित ठाउँमा स्थानान्तरणको व्यवस्था मिलाउने, जनधनको सुरक्षा गर्न आवश्यक प्रवन्ध मिलाउने निर्णय बैठकले गरेको छ ।
फुटेर धार परिवर्तन गरेको ठाउँमा लगभग ३ सय मिटर लामो बाँध निर्माणका लागि डिभिजन सिंचाई कार्यालयले प्राविधिक सहयोग गर्ने, जसमा नगरपालिकाले तत्काल काम थाल्ने, अस्थायी रोकथामका लागि बालुवाको बोराको बाँध बाँध्न सिंचाईले ८ हजार थान बोरा र ५० थान तारजाली नगरपालिकालाई उपलब्ध गराउने निर्णय भएको छ ।
त्यसैगरी कटान र क्षति तथा संभावित खतराको विषयमा तत्काल जानकारी गराउन सञ्चार माध्यामको प्रयोग गर्ने, कटानबाट बँच्न र बँचाउन सुरक्षा निकायले सतर्कता अपनाएर जनशक्ति खटाउने निर्णय भएको छ । त्यसैगरी बिपतमा परेका स्थानीयबासीलाई आवश्यक राहत व्यवस्था गर्न सबै सरोकारवाला निकायहरुले पहल गर्ने सहमति भएको छ ।
