३
२0७८ भाद्र १३ आईतवार
उदयपुर
ज्यान मार्ने अभियोगमा सजाय पाए पनि भाग्दै आएका उदयपुरका दुई अभियुक्त १६ वर्षअघि पक्राउ परेका छन् । जिल्ला अदालतको फैसला अनुसार ६/६ वर्ष कैद फैसा भए पनि भाग्दै आएका जिल्लाको रौतामाई गाउँपालिका ७ का ४४ वर्षीय अलपबहादुर रिखाम मगर र सोही ठाउँका ३७ वर्षीय पूर्णबहादुर मगर आईतबार पक्राउ परेका हुन् ।
उनीहरुमाथि अदालतले ०६२ असार १५ गते ६ वर्ष कैदको सजाय सुनाएको थियो । तर, सजाय कटाउनुको साटो लुकिछिपी बसेका उनीहरुलाई आईतबार विहान ६ः०० बजेको समयमा जिल्ला प्रहरी कार्यालयको विशेष टोलीले पक्राउ गरेको जनाएको छ । गाउँघरमै लुकिछिपी बस्दै आएको भन्ने सुराकीका आधारमा प्रहरीले उनीहरुलाई नियन्त्रणमा लिएको जिल्ला प्रहरी कार्यालय उदयपुरले जनाएको छ ।
पक्राउ दुवैजनालाई आईतबारै फैसला कार्यान्वयनका लागि अदालतको जिम्मा लगाइएको प्रहरी प्रवक्ता डिएसपी बेदप्रसाद गौतमले बताए । फरार अभियुक्तलाई पक्राउ गरी बक्यौता सजाय र जरिवाना भुक्तान गराउने राज्यको निर्देशनको पालना गर्ने अभियान अन्तर्गत प्रहरीले पछिल्लो समय फरारहरुको खोजी गर्दै पक्राउ गर्ने गरको जनाएको छ ।
