३
२0७८ श्रावण २३ शनिबार
उदयपुरगढी, साउन २३
मदन भण्डारी लोकमार्गमा रुख ढलेर अटोलाई किच्दा एक यात्रुको ज्यान गएको छ । लोकमार्ग अन्तर्गत उदयपुरगढी गाउँपालिका ७ अँधेरी झरना नजिकै शनिबार दिउँसो रुख ढलेर रोकिराखेको अटोलाई किच्दा ३८ वर्षीया महिलाको ज्यान गएको हो ।
अँधेरी झर्ना घुम्न आएकी कटारी नगरपालिका ४ की निशा दनुवारको सडक छेउबाट लडेको रुखले रोकिराखेको प्रदेश नं. २ ०१ ००१ नं. को अटोलाई किच्दा घट्नास्थलमै ज्यान गएको प्रहरीले जनाएको छ । घुमफिर सकेर घर जान लागेका बेला दनुवार अटो चढिसकेकी थिईन् भने अन्य ३ जना अटो चढ्नै लागेका बेला एक्कासी रुख ढलेर अटोमाथि बज्रन पुग्दा घट्ना हुन गएको जिल्ला प्रहरी कार्यालय उदयपुरले जनाएको छ ।
रुखले किचेर अटो नजिकै रहेकाहरु कटारी नगरापलिका ४ कै २७ वर्षीया मीना दनुवार, कटारी ४ कै ४० वर्षीय श्याम दनुवार र अटो चालक कटारी ५ का कुमार तामाङ घाईते भएका छन् । उनीहरुको हात, खुट्टा र टाउकोमा चोट लागेको जनाइएको छ ।
घाईते सबैलाई उपचारार्थ कटारी अस्पताल पठाइएको जिल्ला प्रहरी प्रवक्ता डिएसपी बेदप्रसाद गौतमले बताए । रुखले घट्नास्थलनजिकै रोकिराखेको स १० प ३२७२ नं. को मोटरसाईकलमा पनि क्षति पुगेको प्रहीले जनाएको छ ।
