३
२0७८ श्रावण १४ बिहीबार
उदयपुर, साउन १४
प्रहरीले आपराधिक गतिबिधिमा संलग्न भई फरार रहेकाहरुको खोजी गर्दै पक्राउ गर्ने क्रम जारी राखेको छ । यसै क्रममा २ दिनअघि ३ जना अभियुक्त पक्राउ गरेको उदयपुर प्रहरीले बुधबार थप ५ जनालाई पक्राउ गरेको छ ।
लागूऔषध, जवरजस्ती करणी, बहुबिबाह र सार्वजनिक उपद्रबलगायत आपराधिक क्रियाकलापमा संलग्न भई अदालतबाट दोषी प्रमाणित भए पनि भाग्न सफल फरारहरुको खोजी गर्दै पक्राउ गर्ने काम गरिरहेको जिल्ला प्रहरी कार्यालय उदयपुरले जनाएको छ ।
फरार सूचीमा रहेका अभियुक्ताहरु लुकेर बसेको भन्ने सुराकीका आधरमा जिल्ला प्रहरी कार्यालय उदयपरबाट खटेको विशेष टोलीले मंगलबार चौदण्डीगढीका बहुबिवाह आरोपी एक दम्पति र जवरजस्ती करणी अभियोगका फरारलाई पक्राउ गरेको थियो । त्यसैगरी बुधबार साँझ र राति थप ५ जनालाई पक्राउ गर्न सफल भएको हो ।
साँझ ५ः३० बजे लागू औषध गाँजा मुद्धामा फरार त्रियुगा नगरपालिका ८ चुहाडेका ६६ वर्षीय पूर्णबहादुर बिष्टलाई बेलका नगरपालिका ८ को सेतीखोलबाट पक्राउ गरेको जिल्ला प्रहरी प्रमुख एसपी सुबासचन्द्र बोहराले बताए । उनका अनुसार बिष्टलाई गाँजा अभियोगमा जिल्ला अदालत उदयपुरले २८ दिन कैद र २ हजार जरिवानाको फैसला सुनाएको छ ।
तर, भाग्दै आएका बिष्टलाई आफन्तकोमा लुकिछिपी बस्दै आएको सुराकीको आधारमा टोली खटाई पत्राउ गरिएको छ । उनलाई पक्राउलगत्तै फैसला कार्यान्वयनका लागि जिल्ला अदालतमा बुझाइएको एसपी बोहराले बताए ।
त्यसैगरी बुधबार राति ८ः३० बजे सार्वजनिक उपद्रव मुद्धामा दोषी ठहरिएका फरार बेलकाकै थप ४ जनालाई पनि नियन्त्रणमा लिइएको छ । बेलकास्थित इलाका प्रहरी कार्यालय रामपुरको टोलीले बेलका ९ धौरीका २७ वर्षीय मनकुमार राई, बेलाका ३ जाल्पादेवी टोलका ३५ वर्षीय बच्चे भन्ने भीमबहादुर बस्नेत, सोही ठाउँका २८ वर्षीय शंकर खत्री र २४ वर्षीय विनोद बस्नेतलाई पक्राउ गरेको हो ।
पक्राउ सबैलाई फैसला कार्यान्वयनका लागि जिल्ला अदालतमा बुझाइएको छ ।
