३
२0७८ असार ३१ बिहीबार
बेलटार, असार ३१
समय आडम्बरीको छ, म्याद नाघेको पिठो बेच्न आकर्षक प्रचार प्रसारमा जोड दिने 'ट्रेण्ड' बसिसकेको छ । मपाँइत्व दर्शाउन राष्ट्रपति, प्रधानमन्त्री, मन्त्री, पार्टी नेता, उच्च ओहदाका व्यक्ति र समाजका लब्ध प्रतिष्ठितहरुसँग गोरु बेचेको साईनो नभए पनि टाँसिएर फोटो खिच्ने र फेसबुक वालमा राख्ने होड नै चलेको छ ।
त्यस्तै चलेको अर्को व्यापक प्रचलन जन्मदिनको शुभकामना, उपचारकै क्रममा रहेका विरामी मरिसकेको भन्दै श्रद्धाञ्जली पोष्ट गर्न त्यत्तिकै हतार गर्ने पनि हो । धेरै मान्छेहरु जन्मदिनमा आडम्बरका साथ खर्च गर्ने, पाटी खाने कार्य गर्दा झैझगडा र लफडाबाजीसम्म हुने गरेको छ ।
यस्तो प्रबृत्ति झाँगिएकै बेला चौदण्डीगढी नगरपालिकाका एक समाजसेवी युवा भने जन्मदिन पारेर कोभिड अस्पताललाई स्वास्थ्य सामग्री सहयोग गर्न पुगेका छन् । चौनपा ६ बेल्टारको पुष्पलाल चोक बस्ने समाजसेवी ज्ञानेन्द्र प्रधानले उदयपुर कोभिड अस्पताल र त्यहाँ उपचाररत विरामीलाई आवश्यक बिभिन्नखाले स्वास्थ्य सामग्री र फलफुल बितरण गरेका हुन् ।
जन्मदिनको अवसर पारेर उनले बुधबार २५ लिटर सेनीटाइजर, १ थान स्प्रे मेशिन, २० किलो फलफुल, ५ सय थान मास्क, ५ सय जोर पञ्जा, ५ सय थान भिटामिन ‘सी’ र ५ सय थान सेनेटरी प्याड सहयोग गरेका हुन् । प्रधानले अस्पताल परिसरमै आयोजित एक कार्यक्रममा चौदण्डीगढी नगरप्रमुख खगेन्द्र राईलाई उक्त सामग्री हस्तान्तरण गरे ।
नेपाली कांग्रेस निकट युवा उद्यमशिल विकास तथा प्रशिक्षण समन्वय समिति केन्द्रीय सदस्यसमेत रहेका प्रधान यातायात व्यवसायी पनि हुन् । कोविड कहरले समाज थिलथिलो भईरहेका बेला सानै भए पनि सहयोग गर्ने उदेश्यले उनले स्वास्थ्य सामग्री बितरण गरेर जन्मदिन मनाएको बताए ।
जन्मदिन मनाउने नाममा फजुल खर्च गर्नुको साटो कोविड अस्पताललाई सहयोग गरेर रचनात्मक, सृजनसिल र उदाहरणीय रुपमा प्रधानले मनाएको जन्मदिन सैली समाजका लागि पनि प्रेरणादायी भएको मेयर राईले प्रतिक्रिया दिए ।
