३
२0७८ असार १८ शुक्रबार
कटारी, असार १८
मन्त्रालयले तोकेको असार १० गतेभित्र सक्नुपर्ने नगरसभा एकसाता ढिलो गर्दै कटारी नगरपालिकाले शुक्रबार बजेट तथा नीति कार्यक्रम पारित गरेको छ । जिल्लाका ४ नगर र ४ गाउँपालिकामध्ये अन्य ७ वटाले गत १० गते नै बजेट ल्याईसके पनि कटारीले विशेष कारण देखाउँदै सातादिन ढिला बजेट ल्याएको हो ।
कटारी नगरसभाले आगामी आर्थिक बर्ष ०७८७९ का लागि ६९ करोड ०९ लाख २० हजार ५ सय ५० रुपैंयाको बजेट पारित गरेको जनाएको छ । विहिबार सुरु नगर अधिवेशनले सामान्य छलफलपछि बजेट तथा नीति कार्यक्रम पारित गरेको शुक्रबार आयोजित पत्रकार सम्मेलनमा जानकारी दिइयो ।
पत्रकार सम्मेलनमा नगरपालिकाका प्रवक्ता तथा वडा नम्बर ४ का वडाध्यक्ष कृष्णराज दनुवारले आयतर्फ संघीय सरकारबाट प्राप्त हुने ४९ करोड ५९ लाख, प्रदेशबाट ३ करोड ६९ लाख १७ हजार र आन्तरिक स्रोतबाट १८ करोड ८३ लाख ९९ हजार ५ सय ५० को अनुमानित आय पारित गरेको बताए । उनले नगरका १४ वटै वडालाई प्रतिवडा ७० लाखका दरले वडागत बजेट बिनियोजन गरिएको जानकारी दिए ।
नगरका प्रमुख मेयर ज्ञानेन्द्र श्रेष्ठले आगामी वर्ष ५ नम्बर वडाका अति विपन्न बलबहादुर थापा मगरकी श्रीमति दिलमाया थापा मगर र चमेली तामाको परिवारलाई बास बस्ने व्यवस्था मिलाउन आवश्यक जग्गा र घर निर्माण गरिदिने योजना पास गरेको बताए ।
उनले नगरको पहाडी भेगका ५ वडाहरु ९, १०, ११, १३ र १४ लाई टुक्राएर छुट्टै गाउँपालिका निर्माण गर्ने स्थानीयहरुको माग बमोजिम सभाले छलफल गरी आवश्यक प्रक्रिया अघि बढाउन जिल्ला समन्वय समिति, प्रदेश सरकार र संघीय सरकारसमक्ष सिफारिस गर्ने नीति पास गरेको पनि बताए ।
मेयर श्रेष्ठले कोविड रोकथाम कार्यक्रमका लागि १ करोड बजेट छुट्टाएको बताउँदै प्रत्येक स्वास्थ्य केन्द्रबाट एन्टिजेन परीक्षण गर्दै नगरवासीहरुलाई कोविडमुक्त बनाउने योजना पनि पास भएको जानकारी दिए । कोविडबाट बँचाउन नगरवासीलाई छिट्टै खोपको व्यवस्था मिलाउने नीति पनि नगरसभाले पास गरेको उनको भनाई थियो ।
नगर उपप्रमुख भिमकुमारी राउतद्वारा प्रस्तुत नीति कार्यक्रममा नगरको दिर्घकालिन विकासको सोचलाई आधार मान्दै आर्थिक वर्ष २०७८÷७९ ले बिभिन्न आधारभूत कार्यक्रमहरु तय गरेको छ ।
