३
२0७८ असार १४ सोमबार
उदयपुर, असार १४
गाउँघरमा कोविड संक्रमितहरु देखिन नछाडे पनि बजारमा भने प्रभाव कम हुँदै गएको छ । केहीदिनयता संक्रमित थपिनेभन्दा निको हुने क्रम बढ्दै गएको पाइएको छ । पछिल्लो २४ घण्टामा१७ जना संक्रमित थपिदा २९ जना निको भएका छन् ।
आईतबारको कोविड बिबरण अनुसार ७ महिलासहित १७ जना नयाँ संक्रमित थपिएका छन् । नयाँ संक्रमितहरुमा कटारीमा ८ जना संक्रमित देखिएका छने भने त्रियुगामा ५, चौदण्डीगढीमा ३ र ताप्ली गाउँपालिकामा १ जना देखिएका छन् । त्यस्तै १६ महिलासहित २९ जना निको भएर घर फर्केको स्वास्थ्य कार्यालय उदयपुरले जनाएको छ ।
स्वास्थ्यको पछिल्लो रिपोर्ट अनुसार जिल्लामा हाल ४ सय ३६ जनाको उपचार भईरहेको छ । जसमा महिला २ सय १६ छन् भने बाँकी पुरुष संक्रमित छन् । त्यस्तै अहिलेसम्म जिल्लाका १ हजार ७ सय ५९ जना संक्रमितहरु निको भएका छन् । जसमा महिला निको हुनेहरुको संख्या ७ सय ८६ जना रहेको छ ।
हाल त्रियुगाका ४४ महिलासहित १ सय ८ जना संक्रमितको उपचार भईरहेको छ भने कटारीका ११ महिलासहित ३१, बेलकाका ६२ महिलासहित १ सय ९ जना उपचारमा छन् । त्यस्तै चौदण्डीगढीमा सबभन्दा बढी ८४ महिलासहित १ सय ४३ जना संक्रमित उपचारको क्रममा रहेको स्वास्थ्यले जनाएको छ । त्यसैगरी ताप्ली गाउँपालिकाका १२ महिलासहित २९ को उपचार चलिरहँदा लिमचुङबुङ गाउँपालिकाका ३ महिलासहित १४ जना उपचारमा रहेका छन् भने उदयपरगढी र रौतामाईका १–१ जना संक्रमित उपचाररत रहेका छन् ।
निको हुनेमा त्रियुगाका ३ सय ४३ महिलासहित ७ सय ६, कटारीका ६६ महिलासहित १ सय ६०, बेलकाका १ सय १९ महिलासहित २ सय ३४ र चौदण्डीगढीका १ सय ३५ महिलासहित २ सय ८४ जना निको भईसकेका छन् । त्यस्तै रौतामाईका ३४ महिलासहित ९२, उदयपुरगढीका २० महिलासहित ५३, लिमचुङबुङका ४ महिलासहित ९७ र ताप्लीका २१ महिलासहित ५३ जना निको भईसकेको स्वास्थ्य कार्यालयका फोकलपर्सन उमेश लुईटेलले बताएका छन् ।
चौदण्डीगढीमा निशेधाज्ञामा कडाई
अन्य ठाउँमा कोविड संक्रमण कम हुँदै गएका बेला चौदण्डीगढीमा प्रभाव नघटेपछि निशेधाज्ञा कडाई गरिएको छ । केहीदिनयता नगरपालिकाका बिभिन्न गाउँघरतर्फ संक्रमितहरु देखिन नछाडेपछि निशेधाज्ञालाई कडाई गरिएको हो ।
बजारक्षेत्रमा संक्रमण घट्दै गए पनि गाउँघरतिर परीक्षण गर्दा संक्रमण नघटेपछि निशेधाज्ञालाई कडाई गर्ने निर्णय गरिएको नगरप्रमुख खगेन्द्र राईले बताए । उनका अनुसार केहीदिनयता नगरका बिभिन्न वडाका बस्तीहरुमा संक्रमण नघटेकाले निशेधाज्ञालाई अलि कडाई गर्ने निर्णय गरिएको हो ।
असार पहिलो सातापछि जिल्ला प्रशासनले निशेधाज्ञा केही खुकुलो बनाए पनि चौदण्डीगढी क्षेत्रमा भने संक्रमण दर कम नभएका कारण केहीदिन कडाई गर्ने निर्णय गरिएको मेयर राईले बताए । आईतबार सातधारेस्थित उदयपुर कोविड अस्पतालमा ८ महिलासहित ३७ जनाको एन्टीजेन परीक्षण गरिएकोमा ६ महिलासहित १६ जनामा संक्रमण पुष्टि भएको छ ।
संक्रमितहरुमध्ये ६ महिलासहित १२ जना अस्पताल भर्ना भएका छन् भने ४ पुरुष होम आईसोलेसनमा राखिएको छ । त्यस्तै अस्पतालको आईसोलेसनमा उपचाररत २० महिलासहित ४६ जनाको परीक्षण गर्दा ३ महिलासहित ६ जना संक्रमणमुक्त भएका छन् । नयाँ पुराना गरी ३२ महिलासहित ७२ जनाको अस्पताल आईसोलेसनमा उपचार भईरहेको कोविड अस्पतालका फोकलपर्सन तेजबहादुर पोखरेलले बताएका छन् ।
