३
२0७८ जेष्ठ ३१ सोमबार
उदयपुर, जेठ ३०
कोविड प्रभाव घट्दै जाने क्रममा उदयपुरमा पछिल्लो २४ घण्टामा ३० जनामा संक्रमण देखिएको छ । स्वास्थ्य कार्यालय उदयपुरले दिएको जानकारी अनुसार २४ घण्टाभित्र त्रियुगामा ५ महिलासहित १३, चौदण्डीगढीमा ८ महिलासहित १६ र बेलकामा २ महिला गरी १५ महिलासहित ३० जना संक्रमित देखिएका छन् ।
अघिल्लो दिन झैं सोमबार पनि निको हुनेको संख्या संक्रमितभन्दा झण्डै दोब्बर बढी छ । २४ घण्टाभित्र २५ महिलासहित ५८ जना निको भएका छन् । यो सँगै निको हुनेको संख्या जिल्लामा ५ सय ५९ महिलासहित १ हजार २ सय ५३ पुगेको स्वास्थ्य कार्यालय प्रमुख मोहन सुबेदीले बताए । उनका अनुसार पछिल्लो सातादेखि संक्रमित क्रमशः घट्दै गएको छ भने निको हुनेहरु क्रमशः बढ्दै गएका छन् ।
निको हुनेमा त्रियुगाका ५ सय ८३, कटारीका १ सय २८, बेलकाका १ सय ४४, चौदण्डीगढीका २ सय १ जना छन् । त्यस्तै रौतामाईका ८४, उदयपरगढीका ३५, ताप्लीका १० र लिमचुङबुङका ६८ जना निको भएका छन् । हालसम्म उदयपुरका १ हजार ७ सय ३१ जनामा संक्रमण पुष्टि भएको छ । उनीहरुको उदयपुर कोविड अस्पताल बेलटार, आँखा अस्पताल गाईघाट र अन्य बिभिन्न अस्पताल तथा आईसोलेसन सेन्टरमा उपचार भईरहेको छ ।
संक्रमितहरु त्रियुगाका २ सय ८ जना छन् भने कटारीका ३३ जना रहेका छन् । त्यस्तै, बेलकाका ९२, चौदण्डीगढीका ८५ जनाको उपचार भईरहेको छ । लिमचुङबुङ गाउँपालिकाका ३७, उदयपुरगढीका १८, रौतामाईका ८ र ताप्लीका २ जनाको पनि बिभिन्न आईसोलेसन सेन्टरमा उपचार भईरहको स्वास्थ्य कार्यालयको अभिलेखमा उल्लेख छ ।
जिल्ला प्रहरी कार्यालय उदयपुरले जनाएको छ । प्रहरीका अनुसार जिल्लाभित्र र बाहिर बसोबास गर्ने उदयपुरबासी ५० जनाको हालसम्म कोविडले ज्यान लिएको छ । प्रहरीले कोविड नियन्त्रणका लागि जिल्ला प्रशासनले लागू गरेको निशेधाज्ञालाई कार्यान्वयन गर्ने क्रममा नियमित अनुगमन गरिरहेको छ ।
प्रहरी प्रमुख एसपी भीम दाहालका अनुसार हरेक दिन विना काम बजार निस्कने सवारी साधनलाई होल्ड गरेर साँझ ६ बजे छाड्ने गरिएको छ । जस अुनसार आईतबार पनि ४२ वटा सवारी साधन कारबाहीमा परेका छन् । अनावश्यक हिडडुल गर्ने १ सय ९१ जनालाई सम्झाई बुझाई घर फर्काएको छ भने ९८ ठाउँमा कोविडविरुद्ध जनचेतनामूलक प्रचार प्रसार कार्यक्रम गरिएको छ ।
