उदयपुरमा निशेधाज्ञा खुकुलो, १२ बजेसम्म पसल खुल्ला

३

उदयपुर, जेठ २८

कोविड संक्रमण घट्दै निको हुने क्रम बढ्न थालेपछि उदयपुरमा भोलिदेखि निशेधाज्ञा केही खुकुलो पारिने भएको छ । गत वैशाख २५ देखि जारी निशेधाज्ञा आजै (शुक्रबार) राति १२ः०० बजेसम्म जारी गरिएको थियो । आज बसेको जिल्ला कोविड व्यवस्थापन समिति (डिसिएमसी) बैठकले आउँदो असार ७ गतेसम्म निशेधाज्ञा जारी राख्ने तर, खुकुलो पार्दै लाने निर्णय गरेको हो । 

विहान ७ः०० देखि ९ः०० बजेसम्म मात्र तरकारी, फलफुल, माछामासु, दुलगायत खाद्यान्न पसल खोल्दै आएकोमा अव सुरक्षा सतर्कता अनिवार्य अपनाएर १२ः०० बजेसम्म खुल्न दिइने छ । त्यसैगरी विकास निर्माणको काम सुचारु गर्न निर्माण सामग्रीका पसलहरु पनि मध्यान्हसम्म खोल्न दिइनेछ । 

अस्पताल, एम्बुलेन्स, बिरामी कुरुवा, मृत्यु संस्कार, खानेपानी, स्वास्थ्य, पेट्रोलियम पदार्थ, दुध, फुलफल, खाद्यान्नको ढुवानीमा रोक लगाइने छैन । बैंक तथा बित्तीय संस्थाहरु नेपाल राष्ट्र बैंकले तोके अनुसार सञ्चालन हुन दिइने छ । अत्यावश्यक कामबाहेक बजार हिडडुलमा भने कडाई गर्ने कार्य यथावत राख्ने निर्णय भएको सिडिओ तुलसीराम सेँढाईले बताए ।

बैठकले बिना मास्क हिड्नेलाई पटकैपिछ १ सय रुपैंया जरिवाना गर्नसक्ने अधिकार गस्तीमा रहेका सुरक्षाकर्मीलाई दिएका छ । बिनाकाम निस्कने दुईपाङ्ग्रे सवारी साधनलाई पटकैपिछे २ हजार र संस्थाको हकमा पटकैपिछे ५ हजार जरिवाना लिनसक्ने छ । 

‘कोविड १९ शंकट व्यवस्थापन अध्यादेश २०७८’ अनुसार जवरजस्ती गरी निशेधाज्ञा उल्लंघन गर्नेलाई व्यक्ति भए १ लाखसम्म र संस्थाको हकमा ५ लाखसम्म जरिवाना तिराउने प्रावधान लागू गरिनेछ । जिल्लाबाहिरबाट आउने आगन्तकहरुले स्थानीयतहले तोकेको क्वारेन्टीन तथा आईसोलेसन सेन्टरमा अनिवार्य बस्नुपर्नेछ । 

संक्रमितभन्दा निको हुने बढी, शुक्रबार ४ सय ७९ निको 

उदयपुरमा गएको २४ घण्टामा ४ सय ७९ जना संक्रमित निको भएर घर फर्केका छन् ।  निको हुने यो संख्या अहिलेसम्मकै सबभन्दा धेरै हो । अघिल्लो दिन ९१ जना निको भएका थिए । यो सँगै निको हुनेको संख्या उदयपुरमा ९ सय ७५ पगेको छ जसमा ४ सय २६ महिला र बाँकी पुरुष छन् ।

नयाँ संक्रमित २४ घण्टाभित्र ७० नयाँ थपिएका छन् । बेलकामा १० महिलासहित ३६, चौदण्डीगढीका १० महिलासहित २७ र त्रियुगाका ३ महिलासहित ७ जना नयाँ संक्रमित फेला परेको स्वास्थ्य कार्यालय उदयपुरका तथ्यांक अधिकृत उमेश लुईटेलले बताएका छन् । 

अव जिल्लामा उपचाररत सक्रीय संक्रमितहरु ३ सय १२ महिलासहित ६ सय ६६ छन । उनीहरु उदयपुर कोविड अस्पताल बेलार, सदरमुकामस्थित आँखा अस्पताल गाईघाट र होमआईसोलेसन तथा केही बिराटनगर र धरानका अस्पतालमा उपचाररत रहेको लुईटेलले बताए । 

हालसम्म उदयपुरमा कोविडका कारण मृत्यु हुनेको संख्या ४८ पुगेको छ जसमा महिला १५ र बाँकी पुरुष रहेको जिल्ला प्रहरी कार्यालय उदयपुरले जनाएको छ । प्रहरीका अनुसार निशेधाज्ञा पालना नगर्ने ४१ वटा सवारीसाधनमाथि सोमबार प्रहरीले कारबाही गरेको छ । 

त्यस्तै बिना काम बाहिर निस्केका १ सय ३३ जनालाई सम्झाई बुझाई घर फर्काइएको छ भने १ सय २३ ठाउँमा कोविडविरुद्ध सचेतना प्रचारप्रसार गरिएको छ । शुक्रबारसम्म १ हजार ६ सय ३६ जनाको स्वाव परीक्षण गरिएको प्रहरी अभिलेखमा उल्लेख छ ।