३
२0७८ जेष्ठ २५ मंगलवार
कटारी, जेठ २५
कटारीबाट ताप्लीतर्फ जाँदै गरेका बेला दुर्घटनामा परेको बोलेरोका चालकलाई उपचारार्थ काठमाडौं रिफर गरिएको छ । अघिल्लो साँझ साढे ७ः०० बजे कुखुराको दाना (चारो) बाकेको बा १३ च ५६४८ नं. को जिप उदयपुरगढी गाउँपालिका ३ को चप्लेटीमा दुर्घटना हुँदा चालक गम्भीर घाईते भएका थिए ।
घुम्तीमा अनियन्त्रित भई दुर्घटनामा पर्दा सडकदेखि झण्डै ५ सय मिटर तल खसेर कच्याककुचुक भएको बोलेरोका चालक ताप्लीका २३ वर्षीय आकाश राईलाई कटारी अस्पतालमा उपचार हुन नसकेपछि आज मध्यान्ह काठमाडौं रिफर गरिएको प्रहरीले जनाएको छ ।
निशेधाज्ञा र कोविडका कारण मानव चहलपहल पातलो भएकाले उद्धार गर्न ढिला हुँदा चालक बेहोस भएका थिए । राति नै उदयपुरगढी प्रहरी चौकीको टोलीले दुर्घटनास्थलबाट उद्धार गरी उनलाई कटारी अस्पताल भर्ना गरेको थियो । तर, त्यहाँ उपचार संभव नभएपछि मंगलबार काठमाडौं रिफर गरिएको प्रहरी प्रमुख एसपी भीमबहादुर दाहालले बताएका छन् ।
