लिमचुङबुङलाई अक्सिजन कन्सन्ट्रेटरसहित स्वास्थ्य सामग्री 

३

उदयपुर, जेठ २४

रोजगारी तथा पेशा व्यवसायको सिलसिलामा देशविदेशमा रहेका युवाहरुको समूहबाट लिमचुङबुङ गाउँपालिकालाई कोविडविरुद्धको स्वास्थ्य सामग्री प्राप्त भएको छ । पछिल्लो समय फैलिएको कोविड भेरिएन्टको संक्रमण बढ्दो अवस्थामा युवा समूहले स्वास्थ्य सामग्री खरिद गरेर  गाउँपालिकालाई हस्तान्तरण गरेको हो । 

अभियानका संयोजक लिमचुङबुङ १ बाँसबोटेका सामाजिक अगुवा देवराज राई नेतृत्वको टोली आईतबार गाउँपालिका पुगेर स्वास्थ्य सामग्री हस्तान्तरण गरेको छ । गाउँपालिकालाई अक्सिजन कन्सन्ट्रेटर २ थान, सेनिटाईजर १ सय २० थान, मास्क ७ हजार ७ सय ५० थान र शक्तिबद्र्धक खाजा हर्लिक १४ किलो उपलब्ध गराएको संयोजक राईले बताए । 

टोलीले गाउँपालिका स्वास्थ्य शाखा प्रमुख नौलशेर राई, अस्पतालका आईसोलेसन प्रमुख कर्णशेर राई, वडाध्यक्षलगायत जनप्रतिनिधिलाई हस्तान्तरण गरेको अर्का सामाजिक अगुवा तथा टोली सदस्य राजकुमार राईले बताए । राजनीतिक दलका प्रमुख तथा प्रतिनिधिहरुको उपस्थितिमा सुरक्षा मापदण्ड र दुरी कायम गरी बितरण गरिएका सामग्री गाउँपालिकाका ५ वटै वडालाई बितरण गरिएको छ । 

युवा टोलीले उपलब्ध गराएको सामग्री झण्डै ५ लाख मूल्य बराबरको रहेको छ । ती सामग्री काठमाडौं तथा बिभिन्न देशमा कार्यरत युवाहरुले आफ्नो गाँस काटेर दिएको स्वेच्छिक चन्दा रकमले खरिद गरिएको हो । सहयोग गर्नेमा एसके राई, (शंकर राई), मलेसियाका कैलाश राई, प्रबिण राई, राजकुमार भुजेल, थिरन राई र अनिल राई, साउदी अरवबाट बिजय राई र बयान राई, दुबईबाट नीमा कोयु राई, अमेरिकाबाट शम्भु राई र दोशन राई, दक्षिण कोरियाबाट कविल राई, सञ्जिब बुढाथोकी र अशल किराँती रहेका छन् । 

कोविडले गाउँपालिकाबासीलाई संक्रमण गर्दे लानुका साथै एकजनाको दुखद मृत्यु भईसकेको अवस्थामा सबे मिलेर सहयोग जुटाउदै स्वास्थ्य सामग्री उपलब्ध गराइएको अभियन्ताहरुको भनाई छ ।

प्राप्त सामग्री अक्सिजन कन्सन्ट्रेटर लिमचुङबुङ अस्पतालको आईसोलेसनका विरामीको उपचारमा प्रयोग गरिनेछ भने बाँकी सामग्री वडावडा बितरण गरिनेछ । ७ हजार ७ सय ५० थान मास्कमध्ये ५ वटा वडालाई १–१ हजार थान र बाँकी २ हजार ७ सय ५० थान गाउँ स्वास्थ्य शाखालाई छुट्याइएको छ । त्यस्तै १ सय २० थान सेनिटाईजरमध्ये १ नंं वडालाई २० वटा र अन्य वडालाई १० –१० थान दिइएको अर्का सामाजिक अगुवा टोली सदस्य चुडामणि राईले बताए । 

राईका अनुसार यो अभियान टोलीले यसअघि पनि गाउँपालिकालाई एन्टीजेन किट र पिपिई सेट सहयोग गरेको थियो । गाउँमा कोविड संक्रमण देखिनासाथ संक्रमण नियन्त्रण र त्यसबाट बँचाउने उदेश्यले बिभिन्न देशमा रहेका युवाहरुसँग सहकार्य गर्दै कोविड परीक्षण गर्ने एन्टीजेन किट १ सय थान र २० थान पिपिई सेट सहयोग गरेको गाउँ आईसोलेसन प्रमुख कर्णशेर राईले बताए । 

संयोजक राईका अनुसार लिमचुङबुङमा हालसम्म १ सय जना संक्रमित भईसकेको छन् भने वडा नं. २ का १ पुरुषको ज्यान गईसकेको छ । हालसम्म १५ महिलासहित ३० जना निको भईसकेका छन् भने २४ महिलासहति ६८ जनाको उपचार भईरहेको छ । १० शैयाको आईसोलेसन सेन्टरमा ५ थान अक्सिजन सिलिण्डरसहितको व्यवस्था छ । थोरै शैया भएकाले जटिलखालका बिरामीलाई भर्ना गरेर उपचार गराउने गरेको र सामान्यलाई होमआईसोलेसन र सदरमुकामलगायत बिभिन्न अस्पताल रिफर गर्ने गरिएको प्रमुख राईले बताए ।