समुद्रपारीका नेपालीबाट कोविड संक्रमितलाई राहत

३

उदयपुर, जेठ २१

कोविड महामारीको चपेटामा परेका प्रदेशबासी संक्रमितलाई ‘अन्तराष्ट्रिय नेपाली समाज (इन्स)’ले पोषिलो खानेकुरासहितको राहत बितरण गर्न थालेको छ । महामारीको संक्रमणमा परेर उपचाररत बिरामीको आत्मबल बढाउन तथा रोगप्रतिरोधात्मक क्षमता बृद्धि गर्न इन्सले राहत बितरण गरेको हो । 

इन्स् वैदेशिक रोजगारीको क्रममा समुद्रपारका बिभिन्न देशमा कार्यरत नेपालीहरुको साहित्यिक संस्था हो । महामारीको बेला सहयोग गर्ने उदेश्यले देशभर राहत वितरण गर्ने योजना अनुसार इन्सले १ नम्बर प्रदेश अन्तर्गत उदयपुरको कर्णाली मानिएको लिमचुङबुङ गाउँपालिकालाई सुरुमा राहत दिएको छ । 

जस अनुसार शुक्रबार इन्सका केन्द्रीय उपाध्यक्ष झलक बुढाथोकीको संयोजकत्वमा गठित ‘राहत संकलन तथा बितरण संयोजन समिति’ले गाउँपालिकालाई राहत हस्तान्तरण गरेको छ । सदरमुकाम त्रियुगा नगरपालिका ३ मोतिगडामा आयोजित एक कार्यक्रममा उपाध्यक्ष बुढाथोकी र लिम्चुङबुङ–काठमाडौ समन्वय समाजका संयोजक तबिन्द्र राईले गाउँपालिकाका प्रेस सल्लाहकार दिनेश राईलाई हस्तान्तरण गरे । 

बाराहस्थित आईसोलेसन र होमआईसोलेसनमा उपचाररत संक्रमितलाई बितरण गर्ने गरी १५ बोरा गुणस्तरीय चामल, १० क्रेट अण्डा, १ बोरा चना, १ बोरा मटर, १ बोरा मुगी दाल र फलफुलतर्फ १ कार्टुन स्याउ, १ कार्टुन अनार र पिपिई सेट हस्तान्तरण गरिएको उपाध्यक्ष बुढाथोकीले बताए । 

प्रेस सल्लाहकार राईले सामग्री ग्रहण गर्दै महामारीको शंकटमा आफ्नो गाँस काटेर सहयोग गरेकोमा प्रशंसा गर्दै इन्स र त्यसका पदाधिकारीलाई धन्यबाद दिए । संस्थाले दिएको पौष्टिक आहारजन्य सामग्री यथासिघ्र गाउँपालिका पठाएर संक्रमितलाई बितरण गर्ने सल्लाहकार राईले प्रतिबद्धता जनाएका थिए । 

इन्सका महासचिव अर्जुन श्रीले जन्मभूमिमा व्याप्त महामारीका बेला थोरै भए पनि सहयोग गर्ने उदेश्यले राहत बितरण गर्ने योजना ल्याइएको बताए । प्रवासमा रहेका नेपाली युवाहरुले कोविड संक्रमित बिरामीको उद्धारमा सक्दो सहयोग गर्ने उदेश्यले गाँस कटाएर संकलन गरी राहत सामग्री उपलब्ध गराएको उनले बताए । 

संस्थाका अर्का केन्द्रीय उपाध्यक्ष ईश्वर राईले नेपालमा व्याप्त महामारीबाट बँचाउन थोरै भए पनि सहयोग गर्न पाएकोमा खुसी लागेको बताउँदै राहत बितरण कार्यक्रम प्रदेशका सबै जिल्लामा गरिने, बताए । उनले समाजकी महिला उपाध्यक्ष नजवुल खान र राष्ट्रिय समिति सदस्यद्वय रुपा राई र पारु विकको पहलमा राहतका लागि थप इच्छुकसँग सहयोग संकलन गर्न थालिएको जानकारी दिए । 

राहत संयोजन समितिले केन्द्रबाट आएको रकम अपुग हुने भएपछि अरुसँग पनि सहयोग लिन थालिएको जनाएको छ । जस अनुसार स्वयं उपाध्यक्ष बुढाथोकीले ५ हजार, अमेरिकामा कार्यरत उदयपुरकै माथबरसिंह राउतले ५ हजार, केन्द्रीय सदस्य दुर्गा राईले ५ हजार दिने भएका छन् । 

त्यस्तै, लिमचुङबुङ ५ जाँतेका सन्देश बुढाथोकीले ३ हजार ५ सय र राष्ट्रिय समिति सदस्य रुपा राईले ३ हजार सहयोग दिने प्रतिबद्धता जनाएको उपाध्यक्ष बुढाथोकीले बताए ।