३
२0७८ जेष्ठ २१ शुक्रबार
उदयपुर, जेठ २१
उदयपुरमा तेस्रो पटक निशाधाज्ञा बढाउँदै आउँदो २८ गतेसम्म लम्ब्याइएको छ । जिल्लामा संक्रमित दर मृत्यु हुने क्रम नरोकिएपछि जिल्ला कोविड शंकट व्यवस्थापन केन्द्र (डिसिसिएमसी) उदयपुरले थप एकसातालाई निशेधाज्ञा थप्ने निर्णय गरेको हो ।
सुरुमा वैशाख २५ गतेदेखि ३१ सम्म लागू गरिएको निशेधाज्ञा बढाइएको यो चौथो पटक हो । लगातार निशेधाज्ञा लागू भए पनि संक्रमण र मृत्यु हुने क्रम नरोकिएपछि चौथो सातासम्म बढाइएको डिसिसिएमसी अध्यक्ष तथा प्रमुख जिल्ला अधिकारी तुलसीराम सेंढाईले बताए ।
निशेधाज्ञा थपिए पनि बैंक तथा बित्तीय संस्थाहरु पनि आंशिक रुपमा खुल्ने भएका छन् । संक्रमण बढाउने माध्याम मानव चलखेल अत्याधिक भएको पाइएपछि पछिल्लो १५ दिनयता बैंकहरु पूर्णरुपमा बन्द गरिएका छन् । बिहीबारको डिसिसिएमसी बैठकले बैंक तथा बित्तीय संस्थाहरु आईतबार, मंगलबार र बिहीबार गरी सातामा ३ दिन आंशिक समय खोल्ने निर्णय गरेको हो ।
मानव चलखेल बढेकै कारण संक्रमण तिब्रगतिमा फैलिएको निश्कर्ष निकाल्दै डिसिसिएमसीले जेठ ७ गतेदेखि बैंकहरु बन्द गरेको थियो । बैंकहरु लगातार २ सातासम्म बन्द गर्नाले दैनन्दिन जनजीवनमा असर परेपछि आंशिक खोल्ने निर्ण भएको सिडिओ सेंढाईले बताए।
बिहीबारसम्म उदयपुरमा ४ सय ८० महिलासहित १ हजार ६४ सक्रिय संक्रमित रहेका छन् । निको हुनेको संख्या १ सय ११ महिलासहित २ सय ६३ छ । कोविडका कारण शुक्रबार विहान चौदण्डीगढी नगरपालिका ६ का ४७ वर्षीय १ पुरुषको ज्यान गएको छ ।
बेलटारस्थित उदयपुर कोविड अस्पतालमा उपचाररत उनलाई केहीदिनअघि रिफर गरेपछि विराट मेडिकल कलेज बिराटनगर भर्ना गरिएको थियो । भेन्टिलेटरमा उपचारत उनको शुक्रबार विहान मृत्यु भएको चौदण्डीगढी ६ का वडाध्यक्ष कमल राईले बताए । वडाध्यक्ष राईका अनुसार शुक्रबारसहित चौदण्डीगढीमा कोविडले मृतकको संख्या २ महिलासहित ७ जना पुगेको छ ।
