३
२0७८ जेष्ठ १६ आईतवार
उदयपुर, जेठ १६
आईतबार उदयपुरमा ७६ जना नयाँ संक्रमित थपिएका छन् । जसमा महिला ३२ र पुरुष ४४ पुरुष छन् । यो सँगै जिल्लामा सक्रीय संक्रमतिको संख्या ९ सय १६ पुगेको छ ।
नयाँ संक्रमित सबभन्दा बढी बेलका नगरपालिकामा १९ महिलासहित २७ जना छन् । कटारीमा ११ महिलासहित २१, चौदण्डीगढीमा ८ महिलासहित १८ र त्रियुगा नगरपालिकामा ६ जना पुरुष संक्रमित थपिएका छन् भने रौतामाई गाउँपालिकामा ३ महिलासहित ४ जना रहेको स्वास्थ्यले जनाएको छ ।
ताप्ली गाउँपालिकामा पनि संक्रमित देखिएको भए पनि त्यसको अभिलेख भने स्वास्थ्य कार्यालयको तथ्यांकमा समेटिएको छैन । अघिल्लो दिन जँचाइएकाहरुमा संक्रमण देखिएको तर, औपचारिक बिबरण नआएकाले स्वास्थ्यको तथ्यांकमा अद्यावधि नभएको हो ।
ताप्ली गाउँपालिकाका चालक, एक प्रहरी जवान, एक हवल्दार र एकजना प्रहरी सहायक निरीक्षक (असई) मा एन्टीजेन पोजेटिभ देखिएको स्वास्थ्य कार्यालय प्रमुख मोहन सुबेदीले बताए । तर, औपचारिक जानकारी गाउँपालिकाले पठाउन बाँकी रहकाले तथ्यांकमा अद्यावधि नभएको बताइएको छ । स्वास्थ्य कार्यालय उदयपुरका अनुसार आईतबार संक्रमितमध्ये १४
जना निको भएका छन् ।
पछिल्लो तथ्यांक अनुसार त्रियुगा नगरपालिकामा संक्रमित संख्या घट्दै गएको छ । त्रियुगामा आईतबार ६ जना थपिएका छन् भने शनिबार २ महिलासहित ४ जना संक्रमित देखिएका थिए । सदरमुकामको बजार भएकाले आउजाउ र चलखेल बढी हुने हुँदा संक्रमित ह्वात्तै बढेको गाईघाटमा निशेधाज्ञा कडाई गर्न थालेपछि संक्रमण घट्दै गएको हो ।
उदयपुरगढी, रौतामाई र लिमचुङबुङमा पनि पहिलाको दाँजोमा संक्रमित कम देखिन थालेको छ । बिगत ३ दिनयता उदयपुरगढी र लिमचुङबुङमा नयाँ संक्रमित देखिएका छैनन् भने रौतामाईमा आईतबार ५ जनामा संक्रमण पुष्टि भएको छ । शनिबार पनि यी तीन गाउँपालिकामा कुनै संक्रमित देखिएका थिएनन् ।
गाईघाटमा २१, बेलटामार २६ उपचार हुँदै
चौदण्डीगढी ६ सातधारे बेलटारस्थित उदयपुर कोविड अस्पतालमा हाल १३ महिलासहित २६ जना संक्रमितको उपचार भईरहेको छ । त्यहाँ हालसम्म ९७ जना संक्रमित उपचार्थ भर्ना भएकोमा ५६ जना निको भएर घर फर्किसकेका छन् भने १३ जना रिफर गरिएको छ । दुईजनाको भने दुखद निधन भएको अस्पतालका इन्चार्ज तेजबहादुर पोखरेलले बताए ।
सो अस्पतालबाटै संक्रमित देखिएका चौदण्डीगढीका ६८ महिलासहित १ सय ४१ जना होमआईसोलेसनमा उपचाररत रहेकोमा २६ महिलासहित ५९ जना निको भईसकेका छन् । ४२ महिलासहित ८० जना संक्रमित होमआईसोलेसनमै उपचाररत रहेको पोखरेलले बताए ।
आईतबार अस्पतालमा उपचाररतमध्ये १४ महिलासहित ३७ जनाको फलोअप एन्टीजेन परीक्षण् गरिएको छ भने १० महिलासहित २८ जना नयाँ लक्षण भएकाको परीक्षण गरिएको छ । जसमा ६ महिलासहित १३ जनामा पोजेटिभ देखिएकामध्ये १ जनालाई अस्पतालमा र बाँकी १२ जनालाई होमआईसोलेसनमै राखेर उपचार व्यवस्था मिलाइएको पोखरेलले बताएका छ्न ।
यता सदरमुकाम गाईघाटस्थित आँखा अस्पतालको आइसोलेसनमा २१ जनाको उपचार भईरहेको छ । जसमध्ये २ पुरुष आईतबार भर्ना भएका हुन् भने बाँकी पुराना संक्रमित रहेको आईसोलेसन सेन्टरका फोकलपर्सन शिवकुमार यादवले बताएका छन् ।
