निशेधाज्ञा जेठ २१ सम्म, सक्रमित ८१६, निको हुने १७७ 

३

उदयपुर, जेठ १३

कोविड भेरिएन्ट महामारी रोक्न उदयपुरमा थप एकसाता निशेधाज्ञा लगाउने निर्णय भएको छ । संक्रमण क्रम नरोकिएपछि बिहीबार बसेको जिल्ला कोविड शंकट व्यवस्थापन केन्द्र (डिसिसिएमसी)को बैठकले जेठ २१ गतेसम्मका लागि निशेधाज्ञा लम्ब्याउने निर्णय गरेको हो । 

निशेधाज्ञा थपिएको यो चौथो चरण हो । गत वैशाख २५ गतेदेखि जिल्लामा निशेधाज्ञा लगाउन सुरु गरेको डिसिसिएमसीले यसअघि तीनपटक एकएक साता थप्दै जेठ दोस्रो साता अर्थात १४ गते राति १२ः०० बजेसम्मलाई थपेको थियो । तेस्रो पटकसम्ममा पनि संक्रमण दर नघटेपछि अर्को एकसाता थप गर्ने निर्णय गरेको हो । 

उदयपुरमा पछिल्लो साता संक्रमितको संख्या ५ सय नाघेर बिहीबारसम्म ८ सय १६ पुगेको छ । स्वास्थ्य कार्यालय उदयपुरका अनुसार बिहीबार मात्र २९ महिलासहित ६१ नयाँ संक्रमित थपिएका छन् । नयाँ संक्रमितहरु त्रियुगामा ८ महिलासहित २५,  चौदण्डीगढीका ३ महिलासहित २१, बेलकाका ३ महिलासहित ६ र रौतामाईमा ५ महिलासहित ९ जना संक्रमित रहेका छन् । 

स्वास्थ्य कार्यालय प्रमुख मोहन सुबेदीका अनुसार बिहीबारसम्म १ सय ७७ जनाले कोविड परास्त गरेर घर फर्कन सफल भएका छन् । बिहीबार १३ महिलासहित ५३ जनाले कोविड जितेर घर फर्केका छन् । 

हाल त्रियुगा नगरपालिकामा १ सय ७६ महिलासहित ३ सय ९२ जना सक्रीय संक्रमित रहेका छन् भने २६ महिलासहित ६८ जना निको भएका छन् । कटारीमा ४१ महिलासहित १ सय १ संक्रमितको उपचार भईरहेका बेला ४ महिलासहित ८ जना निको भएका छन् । 

त्यस्तै चौदण्डीगढीमा ४७ महिलासहित ९८ जना संक्रमित उपचाररहत रहँदा २१ महिलासहित ४७ निको भएका छन् भने बेलकामा ३९ महिलासहित ७२ संक्रमितको उपचार भईरहँदा १६ महिलासहित ३४ जना निको भएका छन् । 

त्यसैगरी लिमचुङबुङ गाउँपालिकामा २६ महिलासहित ५१ जना संक्रमित छन् भने ४ महिलासहित ८ जना निको भएका छन् । त्यस्तै रौतामाईमा २३ महिलासहित ७० संक्रमितको उपचार भईरहेको छ भने ३ महिलासहित ७ जना निको भएका छन् । उदयपुरगढीमा १० महिलासहित ३१ जना संक्रमित आईसोलेसनमा रहँदा ३ महिलासहित ४ जना र ताप्लीमा १ मात्र संक्रमित महिला निको भईसकेकी छिन् । 

संक्रमितमध्ये उदयपुर कोविड अस्पताल बेलटारमा ११ महिलासहित ३० जनाको उपचार भईरहेको छ । अन्यको मदन भण्डारी आँखा अस्पताल गाईघाट, कटारी नगर अस्पताल, बेलका नगर अस्पताल र लिमचुङबुङ गाउँ अस्पताल तथा धरान र विराटनगरका अस्पतालहरुमा उपचार भईरहेको स्वास्थ्यले जनाएको छ । 

कोविड अस्पताल बेलटारका इन्चार्ज तेजबहादुर पोखरेलका अनुसार बिहीबार २ महिलामा संक्रमण देखिएको र उनीहरु  होम आईसोलेसनमा रहेका छन् । अस्पतालबाट हालसम्म दोस्रो कोविड भेरिएन्टयता ३३ महिलासहित ८७ जना भर्ना भएकोमध्ये  १५ महिलासहित ४४ जना निको भएका छन् । 

उदयपुरमा हालसम्म १० महिलासहित ३० जनाको कोविडका कारण ज्यान गएको छ । बिहीबार त्रियुगा नगरपालिका २ का एक ४० वर्षीय पुरुषको ज्यान गएको स्वास्थ्यका तथ्यांक अधिकृत उमेश लुईटेलले बताएका छन् ।