३
२0७८ बैशाख ३0 बिहीबार
उदयपुर, वैशाख ३०
कोविड संक्रमण बढ्ने क्रम नरोकिएपछि उदयपुरमा थप एकसाता निशेधाज्ञा लम्ब्याउने तयारी हुँदैछ । कोविड संक्रमित भटाभट देखिन थालेपछि गत २५ गते रातिदेखि जिल्लामा सातादिनका जारी गरिएको निशेधाज्ञा शुक्रबार राति सकिदैछ ।
हरेक दिन संक्रमितको संख्या बढिरहेकाले निशेधाज्ञा अवधि लम्ब्याउन आवश्यक देखिएको भन्दै जिल्ला कोविड शंकट व्यवस्थापन केन्द्र (डिसिसिएमसी)ले सातादिन निशेधाज्ञा जारी गर्न सिफारिस गरेको हो । बिहीबार बसेको बैठकले संक्रमित बढ्ने क्रम नरोकिएकाले निशेधाज्ञा लम्ब्याउन सिफारिस गरेको डिसिसिएमसीका अध्यक्ष तथा प्रमुख जिल्ला अधिकारी तुलसीराम सेंढाईले बताए ।
उनका अनुसार डिसिसिएमसीको सिफारिस अनुसार प्रशासनले निशेधाज्ञा लम्ब्याउने तयारी गरिरहेको छ । डिसिसिएमसीले गरेको सिफारिस अनुसार अव प्रशासनले निर्णय गरेर थप एकहप्तालाई निशेधाज्ञा जारी गर्ने उनले बताए । मानव चलखेल जति कम भयो, उत्ति संक्रमण कम गर्न सकिने भएकाले निशेधाज्ञा लम्ब्याउनु परेको सिडिओ सेंढाईको भनाई छ ।
उदयपुरमा बिहीबार दिउँसोसम्म ३ सय ११ मा संक्रमण पुष्टि भएको छ । अघिल्लो दिनसम्म २ सय ७९ संक्रमित देखिएकोमा बिहीबार १४ महिलासहित ३५ जना संक्रमित थपिएको जिल्ला स्वास्थ्य कार्यालय उदयपुरले जनाएको छ । संक्रमितमध्ये १ सय ३२ महिला छन् भने १ सय ७९ पुरुष रहेको स्वास्थ्य कार्यालयका तथ्यांक अधिकृत उमेश लुईटेलले बताए । उनका अनुसार संक्रमितहरु त्रियुगा नगरपालिकाका २७ र चौदण्डीगढी नगरपालिकाका ८ जना रहेका छन् ।
जसमध्ये उदयपुर कोविड अस्पताल बेलटारको आईसोलेसन सेन्टरमा २२ जनाको र केहीको बिराटनगर, धरान र काठमाडौंमा उपचार भईरहेको छ । हालसम्म २ महिलासहित ४ जना निको भएर घर फर्केका छन् भने ३ महिलासहित ७ जनाको ज्यान गएको छ ।
