३
२0७८ बैशाख २७ सोमबार
अघिल्लो दिन विहान आगलागीबाट टोलै सखाप भएको चौदण्डीगढी नगरपालिका ८ वीरेन्द्र बजारका पीडितलाई नगरपालिकाले राहत उपलब्ध गराएको छ । नगरपालिकाले वडा कार्यालयमार्फत तत्काललाई खाना पकाउने भाँडाकुँडा, ओढ्ने त्रिपाल, खाने थाल बटुका, चामल, दाल, नुन, तेलजस्ता खाद्यान्न र एकसरो लगाउने लुगाको व्यवस्था गरिदिएको छ ।
पीडितलाई सबभन्दा नभई नहुने तात्कालीक आवश्यक्ता खाना, नाना र छानाको व्यवस्था केहीदिनका लागि नगरपालिकाबाट गरिदिएको नगरप्रमुख खगेन्द्र राईले बताए । उता स्थानीय क्लब तथा संघसंस्थाहरुले पनि पीडितलाई आईतबारै केही राहत सहयोग उपलब्ध गराएको नगरपालिकाले जनाएको छ ।
नगरपालिकाले स्थानीय समाधानका लागि केहीदिनभित्रै पीडितहरुको घर पुननिर्माण गर्न आर्थिक सहयोग प्रदान गर्ने तयारी गरेको मेयर राईले बताएका छन् । चौनपाले आगलागीमा परेर घरविहीन भएकाहरुलाई पुननिर्माण गर्न ३ लाखसम्म नगदै सहयोग गरिदिने गरेको छ ।
नगरबासीलाई आगलागीबाट बिपत परेका बेला सहयोग गर्न कार्यविधि नै बनाएर ३ लाखसम्म नगद सहयोग गर्ने गरेको मेयर राईले बताए । ३ लाखसम्मको घर बनाउनुपर्दा नगरपालिकाले नै बनाई दिने गरेको छ भने सो भन्दा बढी खर्चमा घर बनाउनेहरुलाई नगै ३ लाख उपलबध गराउने गरेको मेयर राईले बताए ।
वीरुेन्द्र बजारका भरत राईको घरमा विद्युत सर्ट भएर आईतबार विहान झिसमिसेमा आगलागी हुँदा उनकोसहित टोलका ५ घर जलेर नष्ट भएका थिए भने २ स्थानीयको मोटरसाईकल र ट्याक्टर जलेर क्षति भएको थियो । विहान ४ः१५ बजे लागेको आगोले राईको ३५ लाख बराबरको क्षति भएको थियो भने छिमेकी पदमकुमारी मगरको ३० लाख, शिरिर राईको २० लाख बराबरको घरसहित धनमाल जलेको थियो ।
त्यस्तै अर्का छिमेकी बादलविक्रम राईको १२ लाख बराबरको घर, सोही घरमा बस्दै आएकी उनकै दिदी मुना राईको ३ लाख कृष्ण मगरको १० लाख बराबरको क्षति भएको इलाका प्रहरी कार्यालय बेलटारले जनाएको छ । आगोले पार्किङ गरिराखेको केशव बयलकोटीको स ८ प २७२५ नं. को मोटरसाईकल र को २ त ८२३० नं. को ट्याक्टर जलेर ९ लाख र लाबहादुर राईको बा १३ प ८४८० नं. को मोटरसाईकलमा १ लाख बराबरको नोक्सान भएको प्रहरीले जनाएको छ ।
इप्रका बेलटारका निरीक्षक छेचुन्जो भोटेका अनुसार ५ घरसहित ७ घरधुरी परिवारको १ करोड २० लाखको नोक्सानी आगोले गरेको छ ।
