३
२0७७ चैत्र २७ शुक्रबार
उदयपुर, चैत २७
अदालतले पुनर्जिवित गरिदिएको नेकपा (एमाले)को कारबाहीमा परेको माधव नेपाल झलनाथ खनाल समूहले उदयपुरमा पार्टीको समानान्तर कमिटी गठन गरेको छ । प्रधानमन्त्री तथा नेकपा (एमाले) अध्यक्ष केपी शार्मा ओलीले वरिष्ट नेता नेपालसहित उपाध्यक्ष भिम रावल, उपमहासचिव घनश्याम भुसाल र स्थायी समिति सदस्य सुरेन्द्र पाण्डेलाई साधारण सदस्यसमेतबाट ६ महिनासम्म निलम्बनको कारबाही गरेपछि यो समूहले देशव्यापी समानान्तर कमिटी गठनको क्रममा कमिटी गठन गरेको हो ।
पार्टी अधिवेशनबाट निर्वाचित अध्यक्ष इश्वरमणि राउतकै अध्यक्षतामा भर्खरै २०५ सदस्यीय समानान्तर कमिटी गठन भएको हो । कमिटीको उपाध्यक्षमा कैलाश बस्नेत, सचिव जयराम पंजियार थारु, उपसचिव गीता खड्का छानिएको पार्टीले जनाएको छ । नवगठित कमिटीलाई एमाले पोलिटब्यूरो सदस्य जगन्नाथ खतिवडाले सपथ खुवाएका छन् ।
सपथ लिईसकेको जिल्ला नेतृत्वले आगामी ३ महिनाभित्र जिल्लाका ४ नगरपािलका र ४ गाउँपालिका गरी ८ वटै स्थानीयतह र ७५ वटै वडामा समानान्तर कमिटी गठन गर्ने निर्णय गरेको जनाएको छ । कतिपय स्थानीयतह र वडा कमिटीहरु आफ्नै समूहका रहेकाले त्यसैलाई कायम राखिने छ भने ओली समूहले खोसेका केही ठाउँमा नयाँ कमिटी गठन गर्ने अध्यक्ष राउतले बताए ।
आफुहरुमाथि कारबाहीपछि उत्कर्षमा पुगेको आन्तरिक संघघर्षस्वरुप सबै जिल्लामा समानान्तर कमिटी निर्माण गरेर अघि बढ्ने निर्णय भए अनुार यो क्रमलाई तिब्रता दिइएको जनाइएको छ । जिल्ला पार्टीदेखि बिभिन्न जनबर्गीय संगठनको पनि समानान्तर कमिटी गठन गरिरहेको जनाएको छ ।
जस अनुसार युवा संघ, अनेरास्ववियु, अनेमसंघ, मजदुर संगठन, जनसांस्कृतिक महासंघ, किसान महासंघ र जनसम्पर्कका समानान्तर कमिटीहरु पनि तल्लो तहसम्म गठन गर्ने योजना रहेको पार्टीले जनाएको छ । उदयपुरमा जिल्ला अध्यक्ष राउत र केन्द्रीय सदस्य तथा जिल्ला इन्चार्ज बलदेव चौधरी यही समूहमा रहेका छन् ।
