एमाले नेता सुरेन्द्र गाईघाटमा, झडपको संभावना

३

उदयपुर, चैत २१

एमालेका वरिष्ट नेता माधव नेपाल–झलनाथ खनाल समूहका स्थायी समिति सदस्य सुरेन्द्र पाण्डे उदयपुर आईपुगेका छन् । एमाले उदयपुरको आयोजनामा शनिवार हुने जिलास्तरीय कार्यकर्ता भेलालाई सम्बोधन गर्न उनी यहाँ आएका हुन् । 

पार्टी अध्यक्ष इश्वरमणि राउनका अनुसार गाईघाटस्थित होटल टाउनहलको सभाकक्षमा आयोजित कार्यकर्ता भेलामा पाण्डे सहभागी भएका छन् । पार्टीका वरिष्ट नेता माधव नेपाल, उपाध्यक्ष भीमबहादुर रावल, उपमहासचिव घनश्याम भुसाल र स्थायी समिति सदस्य पाण्डेमाथि कारबाही भएकै बेला नेपाल समूहले गरिरहेको देशव्यापी कार्यक्रमको दौरानमा पाण्डे गाईघाट आएका हुन् ।

कार्यकर्ता भेलाका प्रमुख अतिथि पाण्डेले पार्टी फुटको कारण, प्रतिगमनको सुरुवातमा ओली समूहको भूमिका, वर्तमान अवस्था र भावी रणनीति, आफुहरुमाथि ओली समूहले गरेको पार्टी विधानविपरितको कारबाही र भावी संघर्षका नीतिबारे प्रशिक्षण दिने जिल्ला पार्टीले जनाएको छ । उदयपुरका ८ वटै गाउँ तथा नगरपालिकाबाट नेता कार्यकर्ताको सहभागिता रहेको कार्यकर्ता भेलामा केन्द्रीय सदस्यहरु जगन्नाथ खतिवडा र बलदेव चौधरीलगायतको पनि सहभागिता रहेको जिल्ला अध्यक्ष राउतले बताएका छन् ।      

एमाले ओली समूहका अध्यक्ष केपी ओलीले केहीदिनअघि नेपाल र रावललाई ६ महिनाका लागि साधारण सदस्यसमेत नरहने गरी निस्कासनको कारबाही गरिसकेका छन् । त्यस्तै भुसाल र पाण्डेलाई पनि दुईदिनअघि ओलीले कारबाही गरेका छन् । आफुहरुमाथिको कारबाहीको औचित्य पुष्टि नहुने नेपाल समूहको दावी छ । ओली प्रतिगमनकारी भएको र पार्टी फुटको प्रमुख कारक भएको भन्दै यो समूहले देशव्यापी रुपमा एमालेको समानान्तर कमिटी गठन गर्दै कार्यकर्ता भेला तथा प्रशिक्षण कार्यक्रम गर्दै आएको छ । 

यता ओली समूहले पनि शनिबारै छुट्टै बैठक राखेको जनाइएको छ । दुवै समूहतर्फ खुलिनसकेका कार्यकर्तालाई भेलामा जानबाट रोक्ने उदेश्यले छुट्टै बैठकको आयोजना गरेको हुनसक्ने नेपाल समूहका एक नेताले आँकलन गरे ।  कार्यक्रममा उदयपुरका जनबादी गायक तथा संगीतकार शैलेन्द्र खतिवडा नेतृत्वको सांगीतिक टोलीले भेलामा सहभागी अतिथि तथा सहभागी नेता कार्यकर्तालाई गीत गाएर स्वागत गरेका छन् । 

पार्टीको समानान्तर भेला हुन थालेपछि दुईपक्षबीच झडप हुने संभावना देखिएको भन्दै कार्यक्रमस्थलमा सुरक्षा सतर्कता बढाइएको छ । फागुन २३ गते सर्वोच्चको फैसलाले पूर्व एमाले र माओबादीलाई यथावत व्युँताईदिएपछि साविक एमाले पार्टी कार्यालय ओलीपक्षले कब्जा गरेर कार्यक्रमहरु गर्दै आएको थियो ।

पार्टीका निर्वाचिन अध्यक्ष इश्वरमणि राउत र केन्द्रीय सदस्य तथा जिल्ला इन्चार्ज बलदेव चौधरीसहित बहुमत आफुहरुसँग भएको भन्दै नेपाल पक्षले पनि पार्टी कार्यालयमा साईनबोर्ड र झण्डा गाडेपछि केहीदिनयता दुईपक्षबीच झडप हुने अनुमान गरिएको छ । यसैबीच पाण्डेको उपस्थितिमा कार्यकर्ता भेला सोही भवनमा गर्ने तय भएपछि झडपको संभावना बढी भएको भन्दै जिल्ला सुरक्षा निकाय चनाखो भएको बताइएको छ ।

जिल्ला प्रहरी प्रमुख एसपी भीमबहादुर दाहालले पार्टी कार्यालयमा नभई होटलमा कार्यकर्ता भेला गर्ने भएपछि झडपको कुनै संभावना नरहेको बताए । उनले संभावित खतराप्रति सचेत हुादै आवश्यक सुरक्षा व्यवस्था तयारी गरिएको बताएका छन् । नेपाल समूहले भने नेता कार्यकर्ताको संख्या अत्याधिक भएपछि सहभागी नआँट्ने भएकाले कार्यालय भवनमा नभई होटलमा कार्यक्रम गर्नुपरेको जनाएको छ ।