३
२0७७ चैत्र १३ शुक्रबार
उदयपुर, चैत १३
सदरमुकाम नजिकै एक टोलविकास संस्थाको कार्यालय रहेको घरमा आगालगी हुँदा १८ लाख बराबरको धनमाल नष्ट भएको छ । शुक्रबार विहान २ः३० बजे एक्कासी भएको आगलागीबाट त्रियुगा नगरापलिका १० रातमाटे टोल विकास संस्थाको कार्यालय रहेको घर र घरभित्र रहेका सम्पूर्ण धनमाल जलेर नष्ट भएको हो ।
आगलागीले संस्थाको कार्यालय रहेको काठ र टायलको छानो भएको दुईतले घर स्थानीय भवकुमारी न्यौपानेको भएको बताइएको छ । आगोले न्यौपातेको घर, घरभित्र रहेका लत्ताकपडा, भाँडाबर्तन, अन्नपात, सुनचाँदी गरी १५ लाख बराबरको क्षति भएको प्रहरीले जनाएको छ ।
त्यस्तै टोल विकास संस्थाको दराज, कुर्सी, टेबललगायत कार्यालयमा रहेका बिभिन्न सरसामान जलेर ३ लाख हाराहारीको क्षति भएको छ । व्यक्तिगत र संस्थाको गरी १८ लाख बराबरको क्षति भएको जिल्ला प्रहरी कार्यालय उदयपुरले जनाएको छ ।
आगलागी भएको थाहा पाउनेबित्तिकै खटेको जिल्ला प्रहरी कार्यालयको टोली, सशस्त्र प्रहरी, नेपाली सेना र स्थानीयको प्रयासमा विहान ३ः५५ बजे आगो पूर्ण रुपमा नियन्त्रणमा आएको प्रहरीले जनाएको छ ।
आगोले चौपाया तथता मानवीय भने हुन नपाएको स्थानीयले बताएका छन् । घरमा जडान भएको विद्युत सर्ट भएर आगलागी भएको हुनसक्ने अनुमान गरिएको छ ।
