''त्रियुगा खेलकुद महोत्सव'' व्याडमिन्टन सकियो, १७ वर्षमुनि सौरभ प्रथम 

३

उदयपुर, फागुन २५

गाईघाटमा जारी ‘प्रथम त्रियुगा नगरस्तरीय खेलकुद महोत्सव ०७७’ को तेस्रो दिन व्याडमिन्टन खेल सकिएको छ । अघिल्लो दिनदेखि सुरु व्याडमिन्टनमा १७ वर्षमुनिको स्पर्धामा सौरभ ठकुरी प्रथम भएका छन् । प्रतिश राई (बुद्ध) दोस्रो भएका छन् ।

८ खेलाडीले प्रतिस्पर्धा गरेको खेलमा ठकुरी प्रथम भएका हुन् । खुल्ला जोडीतर्फ हिमाल श्रेष्ठ र सरोज खवासले प्रथम स्थान हासिल गरेका छन् भने भेट्रान्सतर्फ दिपक राई र गोविन्द थापाको जोडीले उपाधि चुमेको छ । सोही जोडी खुल्लातर्फ दोस्रो भएको छ भने भेट्रान्सतर्फ चित्र थापा र कालुप्रसाद उरावको जोडी दोस्रो भएको छ । 

खुल्लातर्फ ४८ जोडीको प्र्रतिस्पर्धा थियो भने भेट्रान्सतर्फ १८ जोडीले स्पर्धा गरेको प्रतियोगिताका खेल संयोजक दिपक किरातीले बताए । व्याडमिन्टनका विजयी खेलाडीलाई मंगलबारै त्रियुगा नगरप्रमुख बलदेव चौधरी, प्रमुख जिल्ला अधिकारी तुलसीराम सेढाई, जिल्ला प्रहरी प्रमुख एसपी भिमबहादुर दाहाल, सशस्त्र प्रहरीका एसपी सुधिर सुवेदीलगायतले नगद, ट्रफि, शिल्ड र प्रमाणपत्र वितरण गरे । 

खुल्ला र भेट्रान्स प्रथमलाई १५ हजार, दोस्रो र तेस्रोलाई क्रमशः १० हजार र ५ हजार नगदसहित पुरस्कार दिइएको खेलमा १७ वर्षमुनिका विजेता प्रथम, दोस्रो र तेस्रोलाई क्रमशः १० हजार ७ हजार र ५ हजार नगद, ट्रफि र प्रमाणपत्र प्रदान गरिएको छ ।     

महोत्सवको पहिलो दिन आईतबार साईक्लिङ प्रतिस्पर्धा हुँदा रुवेन राई प्रथम, केशव थापा दोस्रो र अवतार राई तेस्रो भएका थिए । त्यसैगरी महिलातर्फ लक्ष्मी मगर, जमुना थापा र आसा लिम्बु क्रमशः प्रथम, दोस्रो र तेस्रो भएको नेपाल साईक्लिङ संघ उदयपुरका अध्यक्ष जितु रोईलाले बताए । 

उद्घाटनकै दिनदेखि जारी फुटबलतर्फको प्रतिस्पर्धा कायमै छ । त्रियुगा १३ स्थित थरुहट उदयपुर रंगशालामा जारी फुटबलमा मंगलबारसम्म वडा नं. २, ३, ७, ८, ९, १० ११, १२ र १३ ले प्रतिस्पर्धा गरिसकेको अखिल नेपाल फुटबल संघका अध्यक्ष रञ्जन कार्कीले बताए । 

फागुन २ गतेसम्म सञ्चालन हुने महोत्सवको अन्तिम दिन फुटबलको फाईनल हुने आयोजक त्रियुगा नगर युवा तथा खेलकुद विकास समितिका अध्यक्ष प्रदिप श्रेष्ठले बताए । उनका अनुसार महोत्सवमा फुटबल, भलिवल (महिला पुरुष दुवैतर्फ), क्रिकेट, साईक्लिङ, कराँते, तेक्वान्दो, बक्सिङ र व्याडमिन्टनमा प्रतिस्पर्धा गराइनेछ ।