आम हड्तालले उदयपुर ठप्प

३

गाईघाट

प्रधानमन्त्री तथा नेकपा अध्यक्ष केपी ओलीले कानुनविपरित संवैधानिक आयोगमा पदाधिकारी नियुक्ति गरेको विरोधमा प्रचण्ड–माधव (प्रमा) समूहको नेकपाले आव्हान गरेको आम हड्तालले उदयपुर ठप्प भएको छ । बन्दका कारण सदरमुकाम गाईघाट, कटारी, बेलटार र रामपुरका बजार, पसल, स्कुल क्याम्पसहरु सबै बन्द भएका छन् भने लामो तथा छोटो दूरीका यातायात ठप्प भएका छन् ।

आम हड्ताल सफल पार्न प्रमा समूहका नेता कार्यकर्ता तथा भातृ भगिनी संगठनमा आबद्ध कार्यकर्ता बजारका बिभिन्न चोक र सडकमा परिचालन भएका छन् । ठूला साना गाडी कतै नचले पनि प्रेस, एम्बुलेन्स, अस्पताल र बिहेका गाडी निर्वाध खुला छाडिएका छन् । मोटरसाईकल फाटफुट चलेका छन् भने विहान फाटफुट चलेका तीनपाङ्ग्रे अटो केही रिक्साका चावी खोसेपछि मध्यान्हदेखि ती पनि पूर्णरुपमा बन्द भएका छन् । बन्दले गर्दा कर्मचारी र आवश्यक काम परेका सर्वसाधारण साईकल र पैदलयात्रामा निस्केका छन् ।

गाईघाटजसतै पश्चिमी व्यापारिक केन्दै कटारी बजार, चौदण्डीगढी मुकाम बेलटार तथा बेलका मुकाम रामपुर बजार पनि पूर्णत बन्द रहेको स्थानीयले बताएका छन् । दिनरात सयौंको संख्यामा चल्ने लामो तथा छोटो दूरीका सवारी साधनहरु धरान–चतारा–गाईघाट–कटारी–सिन्धुली–हेटौंडा खण्डको मदन भण्डारी लोकमार्गको सडक आज विहानैदेखि सुनसान छ । 

सुनसरी र उदयपुरको सीमा बेलका नरपालिका ८ को चतारा, रामपुर बजार हुँदै चौदण्डीगढीको बेलटार, सदरमुकाम गाईघाट, उदयपुरगढीको नेपालटार, कटारी हुँदै सिन्धुली छिचोल्ने कालोपत्रे सडकमा बन्दको प्रभाव परेपछि विहानैदेखि सारी साधन चलेका छैनन् ।

बन्द हड्तालका बेला अशान्ति हुने जोखिमबाट सतर्क रहँदै प्रशासनले बजार चोक र सडकमा सशस्त्र र नेपाल प्रहरीलाई परिचालन गरेको छ । प्रमुख जिल्ला अधिकारी चक्रपाणी पाण्डेले बन्द हड्तालको अवसरमा हिंसात्मक गतिबिधि हुन नदिन सुरक्षाकर्मी परिचालन गरी सबैतिर सतर्कता अपनाइएको बताए । 

मध्यान्हसम्म जिल्लाका कतै पनि अशान्तिका घट्ना नघटेको जिल्ला प्रहरी प्रमुख एसपी भीमबहादुर दाहालले बताए । बन्दका बेला तोडफोड र ंिहंसा नहोस् भनेर बन्दकर्ता र यातायात व्यवसायी दुवैलाई संयमित हुन आग्रह गरेको र प्रहरीले कतै हस्तक्षेप गर्नु नपरेको दाहालले बताए ।