३
२0७७ पुष २६ आईतवार
उदयपुर
उदयपुरको कटारी नगरपालिका १३ का एकजना भरुवा बन्दुकसहित प्रहरी नियन्त्रणमा परेका छन् । शनिबार इलाका प्रहरी कार्यालय कटारीबाट खटेको टोलीले कटारी १३ मयंखुका ४० वर्षीय प्रकाशकुमार रानामगरलाई बन्दुकसहित नियन्त्रणमा लिएको हो ।
अवैध बन्दुक खेलाउने गरेको भन्ने गोप्य सुराकीका आधारमा खटेको टोलीले मगरलाई दिउसो ३ः४० बजे घरैबाट पक्राउ गरेको जनाएको छ । प्रहरी टोलीले घरमा खानतलासी लिँदा खाली अवस्थामा रहेको एकनाले बन्दुक फेला पारेपछि मगरलाई पक्राउ गरेर अनुसन्धान सुरु गरेको इप्रका कटारीले जनाएको छ ।
जिल्ला प्रहरी प्रवक्ता डिएसपी बेदप्रसाद गौतमका अनुसार कटारी प्रहरीकै हिरासतमा राखेर मगरमाथि अनुसन्धान सुरु भएको छ । जिल्लाभित्र रहेका अवैध हातहतियार संकलन गर्ने अभियान अन्तर्गत बन्दुक फेला परेको गौतमले बताए । जिल्लाका सबै स्थानीयतहका वडाहरुमा पनि अवैध हातहतियार राखेको भए बुझाउन प्रहरीले उर्दी जारी गरेकोछ ।
कसैले लुकाई छिपाई राखेको भए त्यस्ता हतियार कानुनविपरित हुने भएकाले बुझाउन आग्रह गर्दै प्रहरीले फेला पारे ऐन बमोजिम कारबाही हुने चेतावनी दिएको छ । गाउँघरमा गाई बस्तुलाई स्याल र बाघ भालुबाट बँचाउन तथा अन्नबाली बाँदरबाट बँचाउन भरुवा बन्दुक राख्ने प्रचलन रहेको भए पनि यो गैरकानुनी भएकाले हतियार बुझाउनुपर्ने प्रहरी अनुरोध छ ।
