३
२0७७ पुष २३ बिहीबार
उदयपुर
कटारीस्थित ‘वातावरण बचाउका लागि हरित क्रान्ति (जिआरआई) नेपाल’ बिभिन्न शिक्षण संस्थाहरुमा फोहोर व्यवस्थापन गर्ने अभियान थालेको छ । जस अनुसार कटारीका क्याम्पस तथा विद्यालय हातामा फोहोर फाल्ने भाँडो (डस्टविन) बितरण गरेको हो ।
संस्थाले ‘क्लिन कटारी, ग्रिन कटारी’ कार्यक्रमअन्तर्गत वन क्याम्पस कटारीको अनेरास्ववियु र कटारी नगरपालिकाको साझेदारीमा डस्टविन बितरण गरेको हो । ‘परिवर्तनको सरुवात आफैबाट गरौं’ भन्ने नाराका साथ जिआरई नेपालले उदयश्री बहुमुखी क्याम्पस कटारी, वन क्याम्पस कटारी र अन्य विद्यालय परिसरमा फोहोर फाल्ने डस्टविन बितरण गरेको संस्थाका संयोजक प्रकाश महतराले बताए ।
उनका अनुसार विद्यालय तथा क्याम्पस परिसरलाई सफा, सुघ्घर र स्वच्छ वातावरणयुक्त बनाउने उदेश्यले डस्टविन वितरण गर्नुका साथै वातावरण बचाऊबारे बिभिन्न सन्देशमुलक होडिङबोर्डहरु पनि राखिएको छ । कटारी नगरपालिकाका उपमेयर भीमकुमारी राउत, वन क्याम्पस प्रमुख डा. गान्धिब काफ्ले, उदयश्री बहुमुखी क्याम्पस प्रमुख मुकेस थापा, अनेरास्ववियू वन क्याम्पस कटारीका अध्यक्ष युवराज भण्डारी र सचिव आशिष जिसीलागयतको टोलीले डस्टविन वितरण गरेको हो ।
दिनदिनै बिग्रदो वातावरणलाई बचाउँदै स्वच्छ र हरियाली बढाउन हरित क्रान्ति अभियान थालिएको जिआरईका सहसंयोजक प्रकृति कोईरालाले बताए । उनका अनुसार बढ्दो जलवायु परिवर्तनले विश्वलाई नै खतरामा पार्दै गएको हुनाले यसप्रति सचेत हुन सबैजना लागी पर्नुपर्ने खाँचो छ । त्यसका लागि सबै मिलेर वातावरण बचाउने अभियानमा लाग्नुपर्नेमा उनले जोड दिए ।
अनेरास्ववियु वन क्याम्पस कमिटी उपाध्यक्ष विशाल भण्डारीले वातवरणको रक्षा गर्न सके मात्र मानव जगतको रक्षा हुने भएकाले त्यसप्रति सबैले मिलेर आआफ्नो तहबाट लागी पर्नुपर्नेमा जोड दिएका थिए ।
