कोविड कहरमा पनि आयल निगम १३ अर्ब नाफामा

३

उदयपुर

नेपाल आयल निगमले पाईपलाईनबाट इन्धन भित्र्याउन थालेपछि एकवर्षमा डेढ अर्व खर्च कटौती भएको छ । भारतको मोतिहारीदेखि नेपालको अमलेखगञ्जसम्म गतवर्ष जोडिएको पाइपलाइनबाट इन्धन ढुवानी  थालेपछि निगमलाई सो खर्च कटौती भई आर्थिक व्ययभार घटेको हो । 

उदयपुर सिमेन्ट उद्योग लि. जलजलेका तत्कालीन महाप्रबन्धक (जिएम) सुरेन्द्रकुमार पौडेल नयाँ कार्यकारी अध्यक्ष भएर निगम भित्रिएपछि यसअघि हुँदै आएको तेल चुहावट, प्रदुषण र ढुवानीमा ढिलासुस्ती रोक्ने योजना अनुरुप निगमले मोतिहारीदेखि अमलेखगञ्जसम्म पाईपलाईनबाट तेल ढुवानी गर्न थालेको थियो । कार्यकारी अध्यक्ष नियुक्त भएको वर्षदिनभित्रै पाईपलाईनबाट तेल ढुवानी योजना कार्यान्वयनमा ल्याएका पौडेलले निगमलाई हाल एकपछि अर्को सुधारको योनजा अघि सारेको बताएका छन् । 

पाइपलाइनबाट इन्धन आपुर्ति गर्न थालेपछि १ वर्षमा १ अर्ब ४७ करोड रुपैयाँ ढुवानी खर्च जोगिएको उनले बताए । यो खर्च कटौती गाडीबाट इन्धन ढुवानी गर्दा लाग्ने भाडा मात्र हो । पाइपलाइनबाट ल्याउन थालेपछि निगमको इन्धन ढुवानी र अन्य खर्च जोड्दा वर्षमा २ अर्ब ५० करोडसम्म खर्च हुने गरेकोमा अहिले त्यो सबै खर्च कटौती भएको पौडेलले बताए । 

१ वर्ष ३ महिनाअघिदेखि सुरु भएको पाईपलाईनबाट इन्धन ढुवानी कार्यबाट  ७८ करोड लिटर डिजेल ढुवानी भईसकेको निगमले जनाएको छ । निगमका अनुसार पाइपलाइनबाट वार्षिक २० लाख हजार किलोलिटर इन्धन ढुवानी गर्न सक्ने क्षमता छ । 

पाईपलाईनबाट इन्धन ढुवानी गर्न थालेकै कारण विश्वव्यापी कोरोना माहामारीमासमेत नेपालमा इन्धनको खाँचो पर्न नपाएको निगमले जनाएको छ । कोविडका कारण विश्वका सबै क्षेत्र प्रभावित भएका बेला लकडाउन लागेपछि नेपाल-भारत आउजाउसमेत रोकिएको थियो । यस्तो बेलामा गाडीबाट ढुवानी गर्नु परेको भए नेपालमा इन्धनको हाहाकार हुने थियो । तर, पाईपलाइनबाट ल्याउने व्यवस्था भएकाले लकडाउनभरी कहिल्यै यन्धनको खाँचो नेपालमा पर्न नदिएको पौडेलले बताए । 

निगमले आर्थिक वर्ष २०७६/७७ मा खुद नाफा १२ अर्ब ८७ करोड रुपैयाँ गरेको जनाएको छ । कोविडका कारण सुरुका ३ महिना इन्धन विक्री नभएकाले नाफा यति मात्र हुन गएको निगमले जनाएको छ । कोविड नभएको भए २५ अर्बभन्दा बढी नाफा हुने प्रक्षपण गरिएको थियो । 

वर्षौंदेखि घाटा सहदै आएको उदयपुर सिमेन्ट उद्योग लि. पौडेल जिएम रहँदा नाफामा गएको थियो । घाटा लागेर टाट पल्टदै गएपछि सरकारले नीजिकरण गर्ने निर्णय गरिसकेका बेला उद्योगको लगाम समात्न आईपुगेका पौडेलले दुईवर्षमै उद्योगलाई आत्मनिर्भर बनाउँदै नाफामा लगेका थिए । जापान सरकारको सहयोगमा स्थापित उद्योगको दैनिक ८ सय मेट्रिक टन उत्पादन क्षमता भएकोमा उनले ९ सय टनसम्म उत्पादन गरेर किर्तीमान कायम गरेका थिए । 

उद्योगको ३ वर्षे कार्यकाल सकिन नपाउँदै उनलाई सरकारले आयल निगमको कार्यकारी अध्यक्षमा नियुक्ति गरेको थियो । अध्यक्ष नियुक्त भएदेखि नै बिभिन्न सुधारका योजना थालेका उनले कोविड कहरमासमेत निगमलाई नाफामा लान सफल भएका हुन् । उनले इन्धनमा चुहावट, चोरी तस्करी नियन्त्रण गर्न निगमलाई छिटै पूर्ण डिजिटलाईज्ड गर्ने योजना अघि सारेर कार्यान्वयनको प्रक्रियामा अघि बढिसकेको बताएका छन ।