३
२0७७ पुष १२ आईतवार
उदयपुर
उहिल्यै चिल्लो भईसक्ने गाईघाट सडकमा भर्खर कालोपत्रे (पिच) गर्न थालिएको छ । बजारक्षेत्रमा सडक चौडा गर्ने नगरपालिकाको निर्णयसँगै बिबाद भएर अल्मलिएको काम सहमति जुटेपछि सुचारु भएको हो ।
‘मदन भण्डारी लोकमार्ग’अन्तर्गत पर्ने सदरमुकाम गाईघाटको बरुवाखोला पुलदेखि बोक्से जाने बाटो प्राथमिक आँखा उपचार केन्द्रसम्मको १ किलोमिटर २ सय मिटर खण्डको सडक फराकिलो पार्ने विषयमा बिबाद भएको थियो । बिबादका कारण गएको वैशाखमै पिच गरिसक्ने गरी काम सुरु भए पनि हुन सकेको थिएन ।
नगरपालिका, लोकमार्ग कार्यालय, प्रशासन र निर्माण व्यवसायीबीचको पटक पटकको छलफलबाट अरु ठाउँमा कुरा मिले पनि पुरानो गाईघाट चोक (पिजी चोक)मा केही स्थानीयबची कुरा नमिल्दा काम अवरुद्ध हुन पुगेको थियो । पछिल्लो प्रयासले त्यहाँका सथनीयबीच पनि सहमति भएपछि काम सुचारु भएको लोकमार्ग कार्यालय गाईघाटले जनाएको छ ।
बिबाद मिलेसँगै अवरुद्ध पजीचोकस्थित ५ सय मिटर खण्डको काम शुक्रबारदेखि सुचारु भएको लोकमार्ग कार्यालय प्रमुख (डिई) बेलबहादुर भुजेलले बताए । बिबादका कारण बजारभन्दा पूर्वतर्फ बरुवाखोला पुलदेखि चतारासम्म र पश्चिमतर्फ प्राथमिक आँखा उपचार केन्द्रदेखि कटारीसम्म पिच भईसकेको वर्षदिन बित्दासम्म गाईघाट बजारबासी धुलाम्य हुनु परेको छ ।
नगरपालिकाले तोके अनुसार उत्तर र दक्षिण दुवैतर्फ साविकभन्दा दुई–दुई मिटर जमिन छाड्न स्थानीय सहमत भएपछि २० मिटर सडक पिच हुने गरी काम सुचारु भएको भुजेलले बताए । सहमति अनुसार विद्युतका पोल दुईमिटर सार्ने काम शनिबार सकिएको छ भने नाला बनाउन थालिने छ ।
बिबाद नभएको भए गत वैशाखमै काम सकिने तय भएकोमा कोविडले रोकिएको थियो । कोविडकै बीचमा पनि सहमतिको प्रयास गरेर असारभित्र गाईघाटको सडकलाई चिल्लो बनाईसक्ने डिई भुजेलले बताएका छन् ।
