३
२0७७ पुष १0 शुक्रबार
उदयपुर
ताप्ली बम काण्डमा संलग्न भएको आरोपमा पक्राउ परी महिनादिनपछि हिरासतमुक्त भएका जिल्ला विकास समितिका पूर्व सदस्य गौरबहादुर देवकोटा र पविता रपालले आफुहरु नेत्रविक्रम चन्द (बिप्लब) नेतृत्वको प्रतिबन्धित समूहमा नरहेको घोषणा गरेका छन् ।
गत मंसिर ६ गते ताप्ली गाउँपालिका कार्यालयमा भएको बम विष्फोटको घट्नामा संलग्न भएको आरोपमा पक्राउ परेका ताप्ली गाउँपालिका ५ का गौरबहादुर देवकोटा र ताप्ली १ पिपलभञ्ज्याङकी पबिता रपालले शुक्रबार छुट्टाछुट्टै बिज्ञप्ती जारी गरी आफुहरु बिप्लव समूहमा संलग्न नरहेको स्पष्ट पारेका हुन् ।
गाउँपालिकामा बम विष्फोट भएको घट्नापछि बिप्लब समूहमा संलग्न भएको आशंकामा ६७ वर्षीय देवकोटा र ३० वर्षीया रपाललाई नियन्त्रणमा लिएर प्रहरीले अनुसन्धान थालेको थियो । अनुसन्धानको क्रममा उनीहरु निर्दोष भएको ठहर भएपछि हिरासतमुमक्त भएका थिए । देवकोटा र रपालले जारी गरेको विज्ञप्तीमा आफुहरु बिप्लब समूहमा मात्र नभएर कुनै पनि पार्टीमा संलग्न नभएको स्पष्ट पारेका छन् ।
विज्ञप्तीमा देवकोटा र रपालले आफुहरु २ वर्षअघिदेखि नै उक्त समूहबाट अलग भएको र हाल कुनै पनि जिम्मेवारीमा नरही स्वतन्त्रतापूर्वक जीवन बिताईरहेको उल्लेख गरिएको छ ।मंसिर ६ गते ताप्लीमा बिष्फोट हुनुका साथै गाउँपालिका प्रवेशद्वारमा एउटा सकेट बम फेला परेको थियो । बेवारिसे बम १८ घण्टापछि नेपाली सेनाको डिस्पोजल टोलीले निस्कृय पारेको थियो ।
त्यसको दुईसाता नबित्दै मंसिर १८ गते कटारी ८ मर्जेतपुरस्थित सौर्य सिमेन्टको चुनढुंगा खानीमा ५ मजदुर घाईते हुनेगरी ४ वटा बम विष्फोट भएको थियो । त्यसको केहीदिनपछि पुस १ गते त्रियुगा नगरपालिका १४ को धाब्लाङमा अर्को २ वटा बम विष्फोट भएको थियो ।
यसरी एकपछि अर्को विष्फोट हुनुमा प्रतिबन्धित बिप्लब समूहका कार्यकर्ताको संलग्न भएको आशंकामा प्रहरीले सोधपुछ गर्ने भन्दै केही व्यक्तिलाई नियन्त्रणमा लिएको छ । सोही क्रममा देवकोटा र रपाल पक्राउ परेका हुन् ।
