३
२0७७ मंसिर १८ बिहीबार
उदयपुर
वन गस्तीमा जाँदा भेटिएको भरुवा बन्दुक पड्कदा बुधबार राति एक वनरक्षक (वनपाले)को मृत्यु भएको छ । गस्ती जाँदा भेटेर ल्याएको बन्दुक कार्यालय आएपछि आफै पड्कदा सवडिभिजन वन कार्यालय तपेश्वरीका वनपाले ४० वर्षीय लेखनाथ वास्तोलाको मृत्यु भएको हो ।
प्रहरीका अनुसार ६ जनाको वन गस्ती टोलीले तपेश्वरीको भुलभुले सामुदायिक वन उपभोक्ता समूह क्षेत्रको जंगलबाट तस्करले छाडेको अवस्थामा फेला पारेको भरुवा बन्दुक कार्यालय ल्याएपछि पड्कदा त्यसको छर्रा लागेर वास्तोला घाईते भएका थिए । उनको घट्नास्थलमै मृत्यु भएको डिभिजन वन कार्यालय उदयपुरले जनाएको छ ।
वास्तोलाको स्थायी घर सुनसरीको दुहवी रहेको बताइएको छ । गस्तीबाट फर्केको टोली कार्यालय आएपछि बन्दुक झिक्ने क्रममा पड्केर उनको मृत्यु भएको प्रारम्भिक अनुसन्धानबाट खुलेको जिल्ला प्रहरी प्रमुख एसपी भीमबहादुर दाहालले बताए । राति १०ः०० बजेको घट्नाबारे थप अनुसन्धान भईरहेको दाहालले बताए ।
डिभिजन वन अधिकृत अम्बिकाप्रसाद पौडेलले घट्नाको पुष्टि गर्दै थप अनुसन्धान सुरु भएको बताएका छन् । बन्दुक पड्केर वनरक्षकको मृत्यु भएको घट्नाबारे थप अनुसन्धान सुरु भएको उनको भनाई छ ।
उदयपुका बिभिन्न सरकारी तथा सामुदायिक वन क्षेत्रको जंगलमा अवैध काठ चोरी तस्करी हुने गरेको तथा वन्यजन्तुको चोरी सिकारीसमेत हुँदै आएको हुनाले गस्ती टोली खटाइदै आएको उनले बताए । यही क्रममा गस्तीले गोली बारुद्ध भरेर राखिएको अवस्थामा एकनाल बन्दुक भेटेर बरामद गरी ल्याएको थियो ।
बन्दुक तस्करले छाडेको अनुमान गरिए पनि सबै विवरण अहिले नै नखुल्ने डिएफओ पौडेलले बताए ।
