३
२0७७ कार्तिक २३ आईतवार
दिनेश राई
लिमचुङबुङ
सत्तारुढ दल नेपाल कम्युनिष्ट पार्टी (नेकपा) को लिमचुङबुङ कमिटीले पूर्णता पाउने भएको छ । पार्टीको गाउँ अध्यक्ष, सचिव र पालिकामा रहेका जिल्ला कमिटी सदस्यहरुको गत २० गते सम्पन्न बृहत बैठकले कमिटीलाई पूर्णता दिने निर्णय गरेको हो ।
पार्टीको जिल्ला कमिटीले गत असार २० गते नै पूर्णता पाएको थियो । कटारी, बेलका र चौदण्डीगढी नगर कमिटी र उदयपुरगढी गाउँ कमिटीले पनि यसअघि नै पूर्णता पाईसकेका छन् । अव लिमचुङबुङ, ताप्ली, रौतामाई गाउँ कमिटी र त्रियुगा नगर कमिटीले पूर्णता पाउन बाँकी रहेको नेकपा कार्यालय सचिव श्याम ढुंगानाले वताए । ढुंगानाका अनुसार कमिपय स्थानीयतहका कमिटीले पूर्णता पाईसके पनि सपथग्रहण हुन सकेको छैन । बाँकी रहेका कमिटीलाई पनि छिट्ट्ै पूर्णता दिएर सपथ गराउने लक्ष्य रहेको ढुंगानाले बताए ।
लिमचुङबुङमा पूर्व एमालेको तर्फबाट ४० र पूर्व माओवादी तर्फबाट ३५ जना सदस्य समेटेर कमिटीलाई पूर्णता दिइने अध्यक्ष भलराज राईले बताए । उनको अध्यक्षतामा ७५ सदस्यीय गाउँ पार्टी कमिटी बन्नेछ । गाउँ कमिटीले पूर्णता पाएलगत्तै २९ सदस्यीय वडा कमिटीहरु गठनको अन्तिम चरणमा पुगेको सचिव झनक बिकले बताए । ‘अहिले वडा कमिटी विस्तारको चरणलाई तिब्रता दिईरहेका छौँ’ सचिव विकले भने ‘कात्तिक २६ गतेभित्र सम्पूर्ण तयारी सकेर २८ गते सपथग्रहण कार्यक्रम राखेका छौं ’
२८ गते हुने सपथग्रहण कार्यक्रममा संघीय सांसद तथा पार्टी १ नं. प्रदेश कमिटी सचिव सुरेशकुमार राई (हिमाल) लाई प्रमुख अतिथि आमन्त्रण गरिएको विकले बताए । विश्व महामारीका रुपमा फैलिएको कोरोना भाईरसका कारण पार्टी कमिटीलाई पूर्णता दिन ढिलाई भएको भन्दै सचिव विकले गाउँपाटी कमिटी पूर्ण भएपछि नेकपा लिमचुङबुङमा सशक्त ढंगले सक्रियताका साथ अघि बढ्ने बताए ।
सपथ कार्यक्रममा जिल्ला कमिटी अध्यक्ष विनोद कटुवाल (दिवश), सचिव इश्वरमणि राउतलगायत नेताहरु सहभागी हुने गाउँ पार्टी अध्यक्ष भलराज राईले बताए । उनका अनुसार गाउँपालिका केन्द्र बाराहास्थित स्वास्थ्य कार्यालयको सभाकक्षमा राखिएको कार्यक्रम बिहान ११ः०० बजेदेखि सुरु गर्ने तय भएको छ ।
